काठमाडौंः राष्ट्रिय प्रजातन्त्र पार्टीको हालै सम्पन्न महाधिवेशनमा पराजित भएपछि क्रुद्ध बनेका पार्टीका पूर्व अध्यक्ष कमल थापा र अध्यक्ष राजेन्द्र लिङ्देन बीच प्रत्यक्ष वार्ता भएको छ ।
राप्रपाको महाधिवेशनमा निर्मल निवासले हस्तक्षेप गरेर आफूलाई हराइएको र आफ्नो राजनीति नै समाप्त पार्न उद्यत रहेको आरोप लगाउँदै आउनु भएका थापासँग पार्टी अध्यक्ष लिङ्देनले बुढानिलकण्ठस्थित थापा निवासमै गएर शनिबार भेट गर्नु भएको पार्टी प्रवक्ता मोहन श्रेष्ठले पुष्टी गर्नुभयो ।
भेटमा अध्यक्ष लिङ्देनले पार्टी भित्रको विवादलाई साम्य पार्ने गरी “युद्ध विराम” गर्न आग्रह गर्नु भएको थियो । लिङ्देनले त्यस भेटमा “मेरो विजयको वैधानिकतालाई चुनौती दिएर किन लेटर बम (पत्र बम) पठाउनु हुन्छ ?” भनी प्रश्न गर्नु भएको पार्टी निकट अर्को स्रोतले बताएको छ ।
एक घण्टाभन्दा बढी भएको यस भेटमा पूर्व अध्यक्ष थापाले पार्टी महाधिवेशनमा निर्मल निवासको हस्तक्षेप प्रति पुनः असन्तुष्टि पोख्नु भएको थियो ।
जवाफमा अध्यक्ष लिङ्देनले आफू महाधिवेशनमा अध्यक्ष पदमा उठ्ने निश्चित भएपछि मात्र पूर्व राजा ज्ञानेन्द्र शाहसँग महाधिवेशनको ९ दिन अघि भेट गरेको जिकिर गर्नु भएको थियो । उहाँहरुबीच पुनः छलफल गर्ने र पार्टीभित्र सहकार्यको वातावरण तयार पार्ने सहमति पनि भएको प्रवक्ता श्रेष्ठले बताउनुभयो ।
