काठमाडौं । हाङझावमा हुने १९ औं एसियाली खेलकुदमा भाग लिन चीन जानुअघि नेपाली राष्ट्रिय क्रिकेट टोलीलाई ठूलो झड्का लागेको छ । नेपालका बायाँ हाते स्पिनर ललित नारायण राजवंशी घाइते भएका छन् ।
नेपाल क्रिकेट संघ (क्यान) का मेडिकल संयोजक अभिशेकराज सिंहका अनुसार ललित बन्द प्रशिक्षणका दौरान घाइते भएका हुन् । बुधबार फिल्डिङ गर्नेक्रममा टियु क्रिकेट मैदानमा ललितको राइट क्लाभिकल फ्राक्चर भएको छ । ललितको आज नै बी एण्ड बी अस्पतालमा शल्यक्रिया गरिदैछ । उनी ६ देखी १२ हप्ता सम्म मैदान बाहिर रहने बताईएको छ । यो सँगै ललितले १९ औं एसियाली खेलकुद गुमाउने भएका छन् ।
१९ औं एसियाली खेलकुद पुरुषतर्फ २७ सेप्टेम्बर देखी ८ अक्टोबर सम्म चीनमा हुँदैछ । प्रतियोगिताको परिवर्तित खेल तलिकाअनुसार नेपाल समूह ‘ए’ मा परेको छ। समूहमा नेपालसँगै माल्दिभ्स र मंगोलिया छन् । नेपालले २७ सेप्टेम्बरमा मंगोलिया र १ अक्टोबरमा माल्दिभ्ससँग खेल्नेछ । समूह विजेता बने नेपाल क्वार्टरफाइनल पुग्नेछ।
प्रतियोगितामा पाँच टेस्ट टोली श्रीलंका, भारत, पाकिस्तान, बंगलादेश र अफगानिस्तानले भने सिधैं क्वाटरफाइनल खेल्नेछन् । समूह ए, बी र सी बाट विजेता टोली क्वाटरफाइनलमा यी पाँच टेस्ट टोलीसँग अन्तिम आठमा भिड्नेछन्।
नेपाललाई ओडिआई मान्यता निरन्तरता गराउन र एसिया कपमा पुयाउन ललितको निकै महत्वपूर्ण योगदान रहेको थियो । ललितले नेपालको लागि २३ ओडिआईमा २८ र १२ टि–२० आईमा १० विकेट लिएका छन् ।
