एजेन्सी । एसिया कप–२०२३ को सुपर–४ चरणको अन्तिम खेल आज भारत र बंगलादेशबीच हुँदैछ । खेल कोलम्बोको आर प्रेमदासा स्टेडियममा नेपाली समय अनुसार दिउँसो ३ः१५ बजे सुरु हुनेछ । टस दिउँसो २ः४५ बजे हुनेछ ।
फाइनलमा स्थान बनाइसकेको भारतीय टोलीसँग प्रतियोगितामा लगातार चौथो जित दर्ता गर्ने मौका छ । भारतले अहिलेसम्म एउटा पनि हार बेहोरेको छैन । प्रतियोगितामा भारतको यो पाँचौं खेल हुनेछ ।
पाकिस्तानसँगको पहिलो खेल भने निष्कर्षविहीन भएको थियो । त्यसपछि भारतले नेपाल, पाकिस्तान र श्रीलंकालाई हराएको थियो ।
बंगलादेशको टोली एसिया कपबाट बाहिरिएको छ । बंगलादेशले भारतविरुद्धको यो खेल जित्यो भने उसको २ अंक मात्र हुनेछ, जुन फाइनल पुगेका श्रीलंका र भारत दुबैभन्दा कम हुनेछ । तसर्थ यो खेल औपचारिकताका लागि मात्रै हुनेछ ।
हेड टु हेडः
भारत र बंगलादेशबीच अहिलेसम्म ३९ ओडिआई खेल भएका छन् । भारतले ३१ खेल जितेको छ भने बंगलादेशले ७ खेल जितेको छ । १ खेलको नतिजा आएको छैन । एकदिवसीय ढाँचामा, दुबै टोलीहरू अन्तिम पटक डिसेम्बर २०२२ मा आमने सामने भएका थिए, तीन खेलको शृंखलामा भारत २–१ ले पराजित भएको थियो ।
कोलम्बोमा शुक्रबार पानी पर्ने सम्भावना ८८ प्रतिशत छ । तापमान २५ देखि ३२ डिग्री सेल्सियस सम्म हुन सक्छ ।
कोलम्बोको आर प्रेमदासा स्टेडियमको पिच सामान्यतया स्पिनरहरूका लागि अनुकूल रहेको छ । यहाँ ब्याट्सम्यानले पनि राम्रो सहयोग पाएका छन् । अर्कोतर्फ, फास्ट बलरहरूले यस मैदानमा कठिनाइको सामना गर्छन् ।
