एजेन्सी । एसिया कप क्रिकेटको सुपर फोर अन्तर्गत आज पाकिस्तान र श्रीलंकाबीच खेल हुँदैछ ।
खेल कोलम्बोको आर प्रेमदासा मैदानमा नेपाली समयानुसार दिउँसो ३ः१५ बजे सुरु हुनेछ । दुबै टोलीका लागि यो खेल निकै महत्वपूर्ण रहेको छ । यो खेलको विजेताले फाइनलमा भारतसँगको भेट पक्का गर्नेछ । पराजित टोली बाहिरिनेछ ।
श्रीलंका र पाकिस्तानको २–२ अंक छ भने खेल जित्ने टोलीको ४ अंक हुनेछ । भारत ४ अंकसहित प्रतियोगिताको फाइनलमा प्रवेश गरिसकेको छ । वर्षाका कारण खेल रद्द भएमा श्रीलंकाले फाइनल खेल्नेछ । किनभने उसको रन रेट पाकिस्तानको भन्दा राम्रो छ ।
दुवै टोलीको यो तेस्रो र अन्तिम सुपर–४ खेल हो । साविक विजेता श्रीलंकाले पहिलो खेलमा बंगलादेशलाई २१ रनले पराजित गरेको थियो भने दोस्रो खेलमा भारतसँग ४१ रनले पराजित भएको थियो ।
अर्कोतर्फ पहिलो सुपर–४ खेलमा पाकिस्तानले बंगलादेशलाई ७ विकेटले हराएको थियो भने दोस्रोमा भारतसँग २२८ रनले पराजित भएको थियो ।
हेड टु हेड
श्रीलंका र पाकिस्तानबीच हालसम्म १५५ ओडीआई खेल भएका छन् । पाकिस्तानले ९२ खेल जितेको छ भने श्रीलंकाले ५८ खेल जितेको छ । ४ खेलको नतिजा आएको छैन भने एक खेल बराबरी भएको छ ।
पछिल्लो पटक दुवै टोली एकदिवसीय ढाँचामा २०१९ मा आमनेसामने भएका थिए । उक्त खेल पाकिस्तानले जितेको थियो । पाकिस्तानले यो खेल जित्यो भने श्रीलंकामाथि उसको यो लगातार नवौं जित हुनेछ ।
पाकिस्तानले प्लेइङ–११ घोषणा गरिसकेको छ । हरिस रउफ, नसीम शाह, फहीम अशरफ र फखर जमान बाहिरिएका छन् । उनीहरुको स्थानमा मोहम्मद हरिस, मोहम्मद नवाज, जमान खान र मोहम्मद वासिमले खेल्नेछन् ।
बिहीबार कोलम्बोमा पानी पर्ने सम्भावना ९३ प्रतिशत छ । तापमान २६ देखि ३१ डिग्री सेल्सियस सम्म हुन सक्छ । कोलम्बोको आर प्रेमदासा स्टेडियमको पिच सामान्यतया स्पिनरहरूलाई सहयोगी भएको छ । यद्यपि, ब्याट्सम्यानहरूले पनि राम्रो समर्थन पाएका छन् । अर्कोतर्फ, फास्ट बलरहरूलाई यो मैदानमा खेल्न गाह्रो हुन्छ ।
