काठमाडौँ । प्रधानमन्त्री पुष्पकमल दाहाल ‘प्रचण्ड’ भदौ ३० गते संयुक्त राष्ट्रसंघको महासभामा सहभागी हुन अमेरिका जाँदै हुनुहुन्छ । प्रधानमन्त्रीसँगै अमेरिका जाने २४ सदस्यीय टोली तय भएको मुख्यसचिव बैकुण्ठ अर्यालले जानकारी दिए । जसमा प्रधानमन्त्रीको निजी सचिवालयबाट मात्रै १० जना जानेछन् ।
प्रधानमन्त्रीको निजी सचिवालयबाट मुख्य सल्लाहकार हरिबोल गजुरेल, स्वकीय सचिवहरू गंगा दाहाल, रमेश मल्ल, प्रेस सल्लाहकार गोविन्द आचार्य, निजी फोटोग्राफर प्रदीपराज वन्त, निजी भिडिओग्राफर नवराज दाहाल, निजी डाक्टर युवराज शर्मा र तीन जना सुरक्षाकर्मी जानेछन् ।
यसैगरी, परराष्ट्रमन्त्री एनपी साउद, उनका स्वकीय सचिव दीपक जोशी, परराष्ट्र सचिव भरतराज पौड्याल, सहसचिव सेवा लम्साललगायत प्रतिनिधि भ्रमण दलमा रहने छन् । मुख्यसचिव बैकुण्ठ अर्याल र राष्ट्रिय सुरक्षा सल्लाहकार शंकरदास बैरागी पनि सहभागि हुनेछन् ।
संयुक्त राष्ट्रसंघको महासभाको ७८ औं सभालाई प्रधानमन्त्री प्रचण्डले असोज ४ गते नेपालका तर्फबाट सम्बोधन गर्नुहुनेछ । न्युयोर्कमा प्रधानमन्त्रीले दीगो विकास लक्ष्य सम्मेलन, क्लाइमेट एम्बिसन समिटलगायत अन्य महत्वपूर्ण एजेन्डासहितका उच्चस्तरीय कार्यक्रममा सहभागी हुने तय भएको छ ।
यस्तै, अमेरिकी राष्ट्रपति जो बाइडेनले आयोजना गर्नुहुने रात्रीभोजमा पनि प्रधानमन्त्रीले सहभागीता जनाउनुहुनेछ । महासभामा प्रधानमन्त्रीले विभिन्न देशका समकक्षी तथा प्रतिनिधि मण्डलसँग साइडलाइन भेटवार्ता गर्नुहुनेछ ।
