विराटनगर । कोशी प्रदेश आज एमाले संसदीय दलका नेता हिक्मतकुमार कार्कीले मुख्यमन्त्रीमा शपथ लिँदैछन् ।
बिहिबार सर्वोच्च अदातलले प्रदेशसभाको सबैभन्दा ठूलो दलका नेताको हैसियतमा कार्कीलाई ४८ घण्टाभित्र मुख्यमन्त्री नियुक्त गर्न परमादेश जारी गरेअनुसार आज प्रदेश प्रमुखको कार्यालयले शपथको तयारी गरेको हो ।
शपथ ग्रहणसँगै कार्कीले आजै २ जना मन्त्री नियुक्त गर्ने तयारी गरेका छन् । कार्कीले आज तीलकुमार मेन्याङ्वो र एकराज कार्कीलाई मन्त्री बनाउने तयारी गरेका बताईएको छ ।
सर्वोच्च अदालतले बिहिबार कोशी प्रदेशका मुख्यमन्त्री उद्धव थापाले लिएको विश्वासको मत असंवैधानिक ठहर गर्दै पदमुक्त गरेको थियो । थापाले गत भदौ ४ मा विश्वासको मत लिदा सभाध्यक्षको मतसहित विश्वासको मत प्राप्त गरेका थिए । सोहिविरुद्ध कार्कीले पर्शुराम खापुङ, मुख्यमन्त्री थापालगायतलाई विपक्षी बनाई रिट दायर गरेका थिए ।
बिहिबार न्यायाधीशहरू सपना प्रधान मल्ल, डा। कुमार चुँडाल र नहकुल सुवेदीको पूर्ण इजलासले संविधानको धारा १६८ को उपधारा ३ बमोजिम कार्कीलाई ४८ घण्टाभित्र कोशी प्रदेशको मुख्यमन्त्री नियुक्त गर्न आदेश दिएको थियो ।
