काठमाडौं । जिल्ला अदालत काठमाडौंमा स्पिनर सन्दीप लामिछानेविरुद्धको मुद्दामा फैसला बहस जारी रहेको छ । न्यायाधीश सकुन्तला कार्कीको इजलासमा सरकारी वकिलबाट बहस गरिएको हो ।
सरकारी वकिल सुरवीर परियारले बहस सिध्याएका छन् भने वादीपक्षका अन्य वकिलहरुले बहस गर्ने क्रम जारी छ । वादी पक्षको बहसपछि प्रतिवादी सन्दीपको पक्षबाट बहस सुरू हुनेछ । आज दुवै पक्षको बहस सकिने सम्भावना भने न्यून रहेको छ । आज सुनुवाइ नसकिएमा हेर्दाहेर्दैमा राखेर उक्त मुद्दा शुक्रवार सुनुवाइ हुनेछ ।
फैसला बहस सुन्न सन्दीप अदालतको इजलासमा उपस्थित भएका छन् । साथै, जाहेरीकर्ता गौशाला–२६ पनि इजलासमा उपस्थित भएकी छन् । बन्द इजलासमा बहस भइरहेकाले असम्बन्धित व्यक्तिहरुलाई भने प्रवेश दिइएको छैन ।
यसअघि भदौ १० गते नै उक्त मुद्दाको अन्तिम सुनुवाइ भनिए पनि ‘हेर्न नभ्याइने’मा परेको थियो । भदौ १० गतेको पेशीमा न्यायाधीश प्रकाशप्रसाद पण्डितको इजलासमा परेको उक्त मुद्दा हेर्न नभ्याउनेमा परेपछि आजलाई पेसी तोकिएको थियो ।
