काठमाडौँ । संसदीय समितिको बैठकमा नेपालका लागि चीनका राजदूतले दिएको गैरकूटनीतिक अभिव्यक्तिलाई नजरअन्दाज गर्न नहुने कुरा उठेको छ ।
अन्तर्राष्ट्रिय सम्बन्ध समितिको बिहीबार बिहान बसेको बैठकमा राष्ट्रिय स्वतन्त्र पार्टी (रास्वपा) का शिशिर खनालले नेपालका लागि चीनका राजदूतले दिएको गैरकूटनीतिक अभिव्यक्तिलाई नजरअन्दाज गरियो भने त्यसले थप असहजता सिर्जना हुनसक्ने समेत बताउनुभयो ।
बैठकमा आम जनता पार्टीका अध्यक्ष प्रभु साहले चिनियाँ राजदूतको अभिव्यक्तिको विषयमा उनले माफी मागे माफी दिनुपर्ने र भविष्यमा नदोहोरिने सुनिश्चित गर्नुपर्नेसमेत बताउनुभयो ।
हालै नेपालका लागि चिनियाँ राजदूत छन सोङले नेपाल–भारतबीचको सम्बन्ध र नेपालको आर्थिक अवस्थाप्रति विवादास्पद र आपत्तिजनक अभिव्यक्ति दिनुभएको थियो ।
राजधानी काठमाडौँमा आयोजित एउटा कार्यक्रममा उहाँले कूटनीतिक मर्यादा विपरीत नेपाल–भारतबीचको परम्परागत बहुआयामिक सम्बन्ध र व्यापारमा खलल पुर्याउने गरी टिप्पणी गर्नुभएको थियो ।
