काठमाडौँ । पूर्वप्रधानमन्त्री एवं नेकपा (एकीकृत समाजवादी) का अध्यक्ष माधवकुमार नेपालले भारतले मिचेका नेपालका कालापानी, लिपुलेक र लिम्पियाधुरा समेटिएको नक्साबारे चीनलाई व्यक्तिगत रूपमा तत्कालीन परराष्ट्रमन्त्रीले मौखिक जानकारी गराएको हो कि लिखित रूपमा पत्राचार गरिएको हो भनेर प्रश्न गर्नुभएको छ ।
वर्तमान परराष्ट्रमन्त्री एनपी साउदले कालापानी, लिपुलेक र लिम्पियाधुरा समेटिएको नक्सा जारी गरेपछि चीनलाई जानकारी गराएको रेकर्ड नभेटिएको भनिरहेका बेला तत्कालीन परराष्ट्रमन्त्री प्रदीप ज्ञवालीले पत्राचार गरिएको दाबी गर्नुभएको थियो ।
प्रतिनिधिसभाको अन्तर्रराष्ट्रिय सम्बन्ध र पर्यटन समितिको बिहीबारको बैठकमा उहाँले नक्साको विषय संवेदनशील रहेको भन्दै यसबारे सत्यतथ्य कुरा सार्वजनिक हुनुपर्ने बताउनुभयो ।
“चीनलाई जानकारी गराएको विषयमा वर्तमान परराष्ट्रमन्त्री र पूर्वपरराष्ट्रमन्त्रीको कुरा बाझिएको छ”, अध्यक्ष नेपालले भन्नुभयो, “तत्कालीन परराष्ट्रमन्त्रीले एक्लाएक्लै गरेको हो कि आधिकारिकरूपमा पत्राचार गरेको हो ?, त्यतिबेला परराष्ट्र मन्त्रालयको अधिकारी पनि त बसेको होला ? मौखिक रूपमामात्रै हो कि लिखित रूपमा जानकारी गराएको हो ?सबै राजदूतहरूलाई जानकारी गराएको हो कि एउटालाई मात्रै हो ?”
पूर्वप्रधानमन्त्री नेपालले २०७७ जेठ ७ मा जारी नक्सालाई प्रतिनिधिसभाले २०७७ जेठ ३१ गते सर्वसम्मतिले पारित गरी संविधानको अनुसूचीमा राखेपछि त्यसबारे अन्तर्राष्ट्रिय सम्बन्ध समुदायलाई जानकारी गराउनुपर्ने बताउनुभयो ।
यस्ता विषयमा कमजोरी गर्न नहुने पनि उनले सुझाव दिँदै उहाँले भन्नुभयो, “यो नक्साको मात्रै होइन अन्तर्राष्ट्रिय सम्बन्धको कुरा हो । यस्ता विषयमा कमी हुनुहुँदैन, संवेदनशील विषय हो ।” उहाँले कूटनीतिक विषयमा देखिएका कमजोरी दोहोर्याउन नहुने बताउनुभयो ।
