काठमाडौँ । नेपाली कांग्रेसका सभापति तथा पूर्वप्रधानमन्त्री शेरबहादुर देउवाले मन्त्रीले भनेपछि कर्मचारीले मान्नै पर्ने बताउनुभएको छ ।
कांग्रेस निकट निजामती कर्मचारी युनियनको कार्यक्रममा उहाँले मन्त्रीहरू आउने जाने हुन् भनेर हेपेपछि आफूले प्रहरी अधिकृतलाई हटाइदिएको स्मरण गर्नुभयो ।
ब्युरोक्रेसीले सरकारको कुरा त मान्नु पर्यो नि, भोट कहाँ हालेको होला ठिकै छ । मन्त्री भइसक्यो चुनाव जितेर आइसक्यो के गर्नुहुन्छ ? मन्त्रीको कुरा पनि मान्नुपर्छ हेर्नुस् । कतिपय कुरा चित्त बुझ्छ बुझ्दैन,नमिल्ने कुरा भन्नुपर्छ”, उहाँले भन्नुभयो, “म आफैँ पनि भर्खर गृहमन्त्री भएको बेला एउटा प्रहरी अधिकृतले यस्ता मन्त्री त आउँछन् जान्छन् भनेछ । लौ त म कहिले जान्छु तिमी चाहिँ जाऊ भनेर हटाइदिएँ । सबैले यसै गर्नुपर्छ भनेको होइन ।”
विसं २०४८ मा देउवाले गृहमन्त्री भएका बेला आइजिपी रत्न शमशेरलाई हटाएर मोतीलाल बोहरालाई बनाउनुभएको थियो । उहाँकै पालाबाट प्रहरीमा ३० वर्षे सेवा हद लागेको थियो, जुन ऐनमा नभए पनि अहिलेसम्म हटेको छैन ।
