जनकपुरधाम । जनकपुरमा स्कुल बसले मोटरसाइकललाई ठक्कर दिँदा चालकको मृत्यु भएको छ ।
जनकपुरधामको मिथिला इन्ष्टिच्युट अफ टेक्नोलोजी स्कुलको बा २ क १५३६ नम्बरको बसले विपरीत दिशाबाट आउँदै गरेको ज ८ प ९२६७ मोटरसाइकललाई ठक्कर दिँदा जलेश्वर नगरपालिका ९ बस्ने ३५ वर्षीय सन्तोष यादवको मृत्यु भएको हो ।
जिल्ला प्रहरी कार्यालय महोत्तरीका डीएसपी दिलिपकुमार गिरीको अनुसार बसको ठक्करबाट घाइते भएका यादवको अस्पताल लैजाँदै गर्दा बाटोमा मृत्यु भएको हो ।
उनको मृत्युपछि स्थानीय बासिन्दाले बस चालकलाई पक्राउ गरी कारबाही अघि बढाउन प्रदर्शन गरेका छन् । प्रदर्शनकारीले दिउँसो १ बजेदेखि जनकपुर-जलेश्वर सडक बन्द गराएर टायर बालेर प्रदर्शन गरिरहेका छन् । दुर्घटनापछि बसका चालक भने फरार रहेका छन् ।
मृतकको शव पोस्टमार्टमका लागि प्रादेशिक अस्पताल जलेश्वरमा राखिएको जिल्ला प्रहरी कार्यालय महोत्तरीले जनाएको छ ।
घटनाबारे थप अनुसन्धान भईरहेको छ ।
