एजेन्सी । भारतको चन्द्रमा मिशन अर्थात चन्द्रयान–३ को ल्यान्डर अगस्ट २३ मा आफ्नो निर्धारित समय साँझ ६ बजेर ४ मिनेट(भारतीय समय)मा चन्द्रमामा अवतरण गर्ने भएको छ ।
आज मिशनको बारेमा जानकारी दिँदै भारतीय अन्तरिक्ष अनुसन्धान सङ्गठन (इसरो)ले सबै प्रणाली समय समयमा जाँच भइरहेको बताएको छ । इसरोका अनुसार यी सबै ठीकसँग काम गरिरहेका छन् ।
यससँगै इसरोले चन्द्रयान–३ द्वारा कैद गरिएका चन्द्रमाका नयाँ तस्बिरहरू पनि सेयर गरेको छ । चन्द्रयानले ७० किलोमिटर टाढाबाट ल्यान्डर पोजिसन डिटेक्शन क्यामेरा (एलपीडीसी) को सहायताले चन्द्रमाबाट यी तस्बिरहरू लिइएको हो । चन्द्रयान–३ अहिले चन्द्रमामा अवतरणका लागि सही ठाउँको खोजीमा छ । यसलाई २५ किलोमिटरको उचाइबाट अवतरण गरिनेछ ।
चन्द्रयान–३ को ल्यान्डरको सफ्ट ल्यान्डिङमा १५ देखि १७ मिनेट समय लाग्नेछ । यो अवधिलाई (फिफ्टिन मिनेट्स इन टेरर) अर्थात् सबैभन्दा कठिन समय भनिन्छ । भारतको चन्द्रयान–३ मिसन सफल भएमा यो चन्द्रमाको दक्षिणी ध्रुवमा अवतरण गर्ने पहिलो देश बन्नेछ ।
चन्द्रमामा अवतरण गर्नुभन्दा दुई घन्टा अघि ल्यान्डरको मोड्युलको स्थिति र चन्द्रमाको अवस्थाका आधारमा उक्त समयमा अवतरण गर्नु उपयुक्त हुन्छ कि हुँदैन भन्ने निर्णय हुन्छ । यदि कुनै कारक मार्क अप टु द मार्क छैन भने, अवतरण अगस्त २७ मा गरिनेछ ।
चन्द्रयानको दोस्रो र अन्तिम डिबुस्टिङ अपरेसन आइतबार राति करिब २ बजे पूरा भएको थियो । यसपछि चन्द्रमाबाट ल्यान्डरको न्यूनतम दूरी २५ किलोमिटर र अधिकतम दूरी १३४ किलोमिटर हुन्छ । डिबुस्टिङमा अन्तरिक्षयान को गति सुस्त बनाइन्छ ।
चन्द्रयान–१ र चन्द्रयान–२ मिसनका परियोजना निर्देशक एम. अन्नादुराईका अनुसार चन्द्रयान–३ ल्यान्डरलाई २५ किलोमिटरको उचाइबाट चन्द्रमाको सतहमा पुग्न १५ देखि २० मिनेट लाग्ने छ । यो समय सबैभन्दा संवेदनशील हुने छ ।
यसपछि, छ पाङ्ग्रे प्रज्ञान रोभर विक्रम ल्यान्डरबाट र्याम्प हुँदै बाहिर निस्कनेछ र इसरोबाट आदेश प्राप्त हुने बित्तिकै चन्द्रमाको सतहमा सर्नेछ । यस अवधिमा यसको पाङ्ग्राले चन्द्रमाको माटोमा भारतको राष्ट्रिय प्रतीक अशोक स्तम्भ र इसरोको लोगोको छाप छोड्नेछ ।
