काठमाडौँ। सांसद सोविता गौतमले विश्वको प्रतिष्ठित पोलिटिसियन अफ द इयर अवार्ड प्राप्त गरेकी छन् । बेलायतको संस्था वान योङ वर्ल्डद्वारा दिइने विश्वप्रसिद्ध सो अवार्ड जित्ने उनी पहिलो नेपाली हुन्।
सो अवार्डको आयोजक बेलायती संस्थाले आज विजेतको घोषणा उसको आधिकारिक वेभसाइटमार्फत गरेको छ।
राष्ट्रिय स्वतन्त्र पार्टी (रास्वपा) बाट काठमाडौं क्षेत्र नं २ बाट प्रत्यक्ष निर्वाचित सांसद गौतमले विश्वका धेरै मुलुकका युवा राजनीतिकर्मीहरुलाई पछि पार्दै सो अवार्ड जितेकी हुन्।
आआफ्नो देश र समुदायको हितमा अतुलनीय काम गरेको प्रमाणका आधारमा १८ वर्षदेखि ३५ वर्षभित्रका युवा नेता नेत्रीहरुबीच को सो प्रतिस्पर्धा सांसद गौतम सर्वोत्कृष्ट ठहरिएकी हुन् ।
संस्थाद्वारा जारी सूचनामा भ्रष्टाचार नियन्त्रणका लागि असरदार आवाज उठाएको, जनता र समुदायका पक्षमा प्रभावकारी काम गरेको र उनका कामले विश्वका अन्य मुलुकहरुका युवा नेतृत्वलाई समेत सन्देश दिन सफल भएको आधारमा गौतमलाई विजेताको छनौट गरिएको जानकारी दिइएको छ।
संस्थाले प्रत्येक वर्ष विश्वका योग्य युवा राजनीतिकर्मीलाई प्रतिस्पर्धामा सामेल गराई संसार प्रसिद्ध विभिन्न विज्ञहरुलाई निर्णायक राखेर सो अवार्डको विजेता छनोट गर्दै आएको छ ।
निर्णायकमा रहेका विज्ञहरुमा मानवअधिकार तथा अभिव्यक्ति स्वतन्त्रताको पक्षमा वकालत गर्ने जाम्बियाकी विज्ञ, राजनीति विज्ञ तथा कोष्टारिकाकी पहिलो महिला राष्ट्रपति, कानूनविद् एवं अन्तर्राष्टिय फौजदारी अदालत हेगका एक न्यायाधीश र अमेरिकाको कोलम्बिया युनिभर्सिटीका प्रध्यापक रहेका थिए।
सांसद गौतमसहतिलाई सो अवार्डबाट सम्मानति गर्न आयोजक संस्थाले आगामी अक्टोबर २ २ देखि ५ तारिखका बीचमा एउटा भव्य समारोह बेलायतमा आयोजना गर्ने भएको छ।
