काठमाडौँ । जिल्ला प्रहरी परिसर काठमाडौँले नक्कली सुन र नक्कली सुनसहित एकजनालाई पक्राउ गरेको छ ।
पक्राउ पर्नेमा गोरखा जिल्ला आरुघाट गाउँपालिका–१० घर भएका ४८ वर्षीय दुर्गाबहादुर खत्री क्षेत्री रहेका छन् । उनलाई प्रहरीले असार ३० गते नागार्जुन नगरपालिका–२ सानोभर्याङस्थित उनको कोठाबाट नक्कली सुन र नक्कली मुद्रासहित पक्राउ गरिएको हो ।
काठमाडौँ–३ बसुन्धरास्थित वडा एरियाअन्तर्गत विभिन्न स्थानमा नक्कली मुद्रा तथा सुनको अवैध कारोबार हुन्छ भन्ने गोप्य सूचनाका आधारमा प्रहरी वृत्त महाराजगञ्जबाट खटिएको अधिकृतसहितको टोलीले केही मानिसहरुको साथबाट नक्कली नेपाली र भारतीय मुद्रा फेला पारी सोधपुछ गर्दा खत्री क्षेत्रीको कोठाबाट पनि नक्कली सुन र नक्कली मुद्रा फेला परेको प्रहरीले जनाएको छ ।
प्रहरीले ती सामानहरु बरामद गरी मुद्रासम्बन्धी कसुर मुद्दामा काठमाडौँ जिल्ला अदालतबाट ४ दिनको अनुमति लिई प्रहरी वृत्त महाराजगञ्जबाट थप अनुसन्धान भइरहेको पनि प्रहरीले जनाएको छ ।
निज खत्री क्षेत्री र भारतको लखनउ स्थायी घर भई हाल काठमाडौँ–१० बस्ने ४५ वर्षीय विनयकुमार सिंहको साथबाट प्र्रहरीले २००० दरका भारतीय नक्कली नोटजस्तो देखिने ४ थान, १००० दरको नेपाली नक्कली नोटजस्तो देखिन ६ थान, ५०० दरको भारतीय मुद्राजस्तो देखिने ४ थान, १ किलो फाइन गोल्ड लेखिएको सुन जस्तो पहेँलो धातु राखिएको क्यूआर कोड राखिएको २०० प्याकेट, सुनजस्तो पँहेलो धातुको टुक्रा राख्न प्रयोग गर्ने प्लास्टिकको पत्ता १०० थान, बागमती प्रदेश–०२–०४१ प ९८८५ नम्बरको २२० सि।सि। को एउटा पल्सर मोटरसाइकल, एउटा लेमिनेसन मेसिन र २ वटा मोबाइल बरामद गरेको छ ।
