काठमाडौं । सत्तारुढ प्रमुख घटक नेपाली कांग्रेसको केन्द्रीय कार्यसम्पादन समितिको बैठक आज (शुक्रबार) पनि बस्दैछ ।
बैठक दिउँसो २ बजे केन्द्रीय कार्यालय सानेपामा बस्ने पार्टी प्रवक्ता प्रकाशशरण महतले जानकारी दिए ।
हिजोबाट सुरु भएको बैठकमा स्थानीय तहको निर्वाचन, एमसिसी र भ्रातृ संस्थाको अधिवेशनमाथि छलफल भइरहेको छ ।
बैठकमा एमसीसीमा पार्टी एकमत रहेको र अगाडि बढाउनुपर्ने निष्कर्ष निकालिएको थियो । आज पनि यसबारेमा सदस्यले धारणा राख्ने बताइएको छ ।
यस्तै, बैठकमा स्थानीय निकायको निर्वाचनमा पार्टीलाई सशक्त ढंगबाट आफूलाई प्रश्तुत गर्ने, जनताको बीचमा अझ सशक्त ढंगले कसरी जोडिने लगायतको विषयमा पनि छलफल भएको थियो ।
भातृसंगठनहरुको समयसीमा सकिएको र स्वतः रिक्त हुने भएकोले त्यसलाई ध्यानमा राखेर भातृ संगठनलाई कसरी सुदृढ गर्ने, बिस्तार गर्ने र समयसीमालाई पनि कसरी तोक्ने भन्ने विषयमा पनि बैठकमा छलफल गरिएको प्रवक्ता महतले जानकारी दिए ।
