काठमाडौँ । सर्वोच्च अदालतमा कार्यरत सबै राष्ट्रियस्तरका ट्रेड युनियहरुले ललितपुर जिल्ला अदालत विवादको समाधान गर्न प्रधानन्यायाधीश, न्यायाधीशहरु र सर्वोच्च अदालत व्यवस्थापनसँग आग्रह गरेका छन् ।
ट्रेड युनियनहरुले बिहीबार संयुक्त विज्ञप्ति जारी गर्दै कुनै पनि घटना वा विषयको विषयान्तरबाट भविष्यमा पर्न सक्ने दूरगामी नकारात्मक प्रभावसमेतलाई मध्यनजर गर्दै विवादको सत्य तथ्य उजागर गरी उचित समाधान गर्न र ललितपुर जिल्ला अदालतलगायतका न्यायपालिकाका सम्पूर्ण कर्मचारीहरुले मानसिक तथा भौतिकरुपमा सुरक्षित महसुस हुने गरी भयरहित वातावरणमा कार्यस्थलमा रही सेवा गर्ने वातावरण निर्माण गर्न माग गरेका छन् ।
यही असार १३ गते ललितपुर जिल्ला अदालतमा वारेस/कानून व्यवसायी र कर्मचारीबीच घटेको घटनालाई विषयान्तर गरी अदालतमा कार्यरत सम्पूर्ण जनशक्तिमाथि तथ्य र आधारहीन लाञ्छना लगाई न्यायपालिकाको अजआस्था खस्कने गरी कानून व्यवसायीहरुको सर्वोच्च संस्था नेपाल बार एसोसिएसन तथा सोअन्तर्गतका चार एकाइहरुबाट जारी विज्ञप्ति र औपचारिक कार्यक्रममार्फत जिम्मेबार कानून व्यवसायीहरुबाट सार्वजनिक भएको अभिव्यक्तिप्रति ट्रेड युनिहरुले गम्भीर ध्यानाकर्षण भएको जनाएका छन् ।
