काठमाडौं । आइसिसी टी–२० विश्वकप ग्लोबल छनोट खेल्नुअघि चार देश सम्मिलित टी–२० सिरिज अन्तर्गत पहिलो खेलमा नेपाललाई घरेलु टोली ओमानले एक सय ३६ रनको लक्ष्य दिएको छ ।
टस जितेर पहिला फिल्डिङ रोजेको नेपालविरुद्ध ओमानले निर्धारित २० ओभरमा ६ विकेट गुमाएर एक सय ३५ रन बनायो ।
नेपालका लागि अविनाश बोहराले ३, सन्दीप लामिछाने, कमल सिंह ऐरी र आरिफ शेखले एक–एक विकेट लिए ।
ओमानका कप्तान जिसन मकसुदले अविजित ४३ रन जोडे भने मोहम्मद नदिम ३१ रनको योगदानी दिए । यस्तै, जतिन्दर सिंहले १३ रन जोड्दा, कश्यप कुमार हरिशभाइ, शोएब खान, आयान खान तिनै जनाले ११ रन बनाए ।
नेपालले ओमानसँग टी–२० मा पछिल्लोपटक सन् २०१९ मा खेलेको थियो । त्यतिबेला ओमानले नेपाललाई ६ विकेटले पराजित गरेको थियो ।
आइसिसी पुरुष टी–२० विश्वकप छनोटअन्तर्गतको ग्लोबल छनोट ‘ए’ खेल्नुअघि नेपालले चारदेशीय सिरिज खेल्न लागेको हो । सिरिजमा आयोजक ओमानसहित, नेपाल, आयरल्यान्ड र युएई सहभागी छन् ।
