नेपाली काँग्रेसका केन्द्रीय सदस्य डा.डिला संग्रौलाको विशेष अग्रसरतामा उहाँको संयोजकत्वमा शुरु भएको अभियान ‘कोभिड विरुद्धको हाम्रो अभियान’ अन्तर्गतको तेस्रो सम्वाद श्रृंखला शनिबार बागमती प्रदेशमा सम्पन्न भएको छ ।
बागमती प्रदेशका लागि आयोजित सो तेस्रो श्रृंखलामा सो प्रदेशका नेपाली काँग्रेसका नेता तथा कार्यकर्ताहरु, चिकित्सक तथा सरोकारवालाहरु एवं कोभिडका संक्रमितहरु समेतसँग अन्तरक्रिया गरिएको थियो । सो कार्यक्रममा दुई सयजना भन्दा बढीको सहभागीता रहेको थियो ।
कार्यक्रमको प्रमुख अतिथिका रुपमा नेपाली काँग्रेसका उपसभापति प्रकाशमान सिंहले नेपाली काँग्रेसले नेपाली जनतालाई कोभिडबाट बच्न र बचाउन गरेका विभिन्न प्रयासहरु अन्तर्गत आजको बागमती श्रृंखला आयोजना भएको र यसले कोरोनाका संक्रमित तथा अरु सबै नागरिकलाई निकै लाभ पुगेको बताए ।
उनले यस्तो महामारीका बेलामा पनि सरकार नेपाली जनताको स्वास्थ्यको ध्यान दिनुको सट्टा सत्ता केन्द्रित भएको भन्दै यस्तो अवस्थामा नेपाली काँग्रेसले जनतालाई सक्दो सहयोग गर्नुपर्ने धारणा राखे ।
यस कार्यक्रमका संयोजक एवं यस अभियानका अभियानकर्ता काँग्रेसका केन्द्रीय सदस्य डा.डिला संग्रौलाले देश कोरोना महामारीले आकुल ब्याकुल भएका बेला कम्युनिष्ट सरकारको स्वार्थ र उनीहरु सत्तास्वार्थमा लिप्त भएको अवस्था सबैले देखेको फेहरिस्त पेस गर्दै यो दुःखद अवस्थामा नेपाली काँग्रेसले आफू जनतासँगै रहेको आभास दिलाइरहेको बताइन् ।
यस अभियानबाट संक्रमित, देशका नीति निर्माताका साथै सबै सर्वसाधारणलाई नै महामारीबाट बाच्न थोरै मात्र भए पनि सहयोग पुग्ने आशाका साथ आफूले सो अभियानको शुरुवात गरेको जानकारी डा संग्रौलाले दिइन् ।
यस तेश्रो श्रृंखलाका वक्ताहरुमा चिकित्सकहरु पनि थिए र उनीहरुले होम आइसोलेसनमा बस्दा तनावको व्यवस्थापनका साथै कोभिडबाट कसरी जोगिने भन्ने विषयमा विज्ञ चिकित्सकहरुले आफ्ना धारणा र सुझावहरु प्रस्तुत गरेका थिए ।
सो कार्यक्रममा कन्सल्टेन्ट आयुर्वेद सर्जन मदन भण्डारीले कोरोना भाइरसको परिचय दिँदै आयुर्वेद तथा वैकल्पिक चिकित्सका पद्दतिबाट कसरी ठीक पार्ने भन्ने बारेमा सुझावहरु प्रस्तुत गरेका थिए ।
त्यसैगरी कोभिडका बारेमा योग तथा पुनस्थापना विशेषज्ञ डा विनोद घिमिरे, बालरोग विशेषज्ञ प्र्रा डा.आरपि विच्छा, आयुर्वेद स्वास्थ्य केन्द्र चितवनका प्रमुख डा.कोपिला अधिकारीले आफ्ना विशेषज्ञतासहितका विचार तथा कोरोनाबाट बच्ने उपायहरुका बारेमा सुझावहरु प्रस्तुत गरेका थिए ।
कार्यक्रमको सञ्चालन बागमती प्रदेश सभा सदस्य विजया श्रेष्ठ केसीले गरेकी थिइन् । यो कार्यक्रम यसअघि प्रदेश नं १ र २ मा सम्पन्न गरिसकिएको छ । ती प्रदेशमा सञ्चालन गरिएका कार्यक्रमहरुबाट धेरै मानिस लाभान्वित भएका र यसबाट धेरैमा यस महामारीका विषयमा जानकारी प्राप्त भएकाले यसलाई देशका सबै प्रदेशहरुमा सञ्चालन गरिने भएको हो ।
भर्चुअल विधिबाट सम्पन्न श्रृंखला आगामी दिनमा देशका सबै प्रदेशमा आयोजना गरिने डा.संग्रौलाले जानकारी दिइन्
