काठमाडौं । आइसिसी टी–२० विश्वकप ग्लोबल छनोट खेल्नुअघि चार देश सम्मिलित टी–२० सिरिज अन्तर्गत पहिलो खेलमा नेपालले ओमानविरुद्ध ६ विकेटको जित निकालेको छ ।
अल अमेरात क्रिकेट मैदानमा १ सय ३६ रनको लक्ष्य नेपालले निर्धारित २०.३ ओभरमा ४ विकेट गुमाएर पुरा गर्यो ।
नेपालका लागि दिपेन्द्र सिंह ऐरीले सर्वाधिक ७३ रन जोडे । ५३ बल खेलेका दिपेन्द्रले ८ चौका र एक छक्का प्रहार गरे ।
यो दिपेन्द्रको टी–ट्वान्टीमा सर्वाधिक रन समेत रहेको छ । यस अघि उनले ६० रन बनाएका थिए ।
यस्तै, आरिफ शेखले २५, आसिफ शेखले १४, ज्ञानेन्द्र मल्लले १३, प्रदिप ऐरीले ४ रन तथा शरद भेषावकर ४ रनमा नटआउट रहे ।
ओमानका कलिमुल्लाहले २ विकेट लिए । खवार अलीले १ विकेट हात पारे ।
यस अघि टस हारेर पहिले ब्याटिङ गरेको ओमानले निर्धारित २० ओभरमा ६ विकेट गुमाउदै १ सय ३५ रन जोड्यो ।
ओमानका कप्तान जिसन मकसुदले अविजित ४३ रन जोडे भने मोहम्मद नदिम ३१ रनको योगदानी दिए । यस्तै, जतिन्दर सिंहले १३ रन जोड्दा, कश्यप कुमार हरिशभाइ, शोएब खान, आयान खान तिनै जनाले ११ रन बनाए ।
नेपालका लागि अविनाश बोहराले सर्वाधिक ३ विकेट लिए ।
कप्तान सन्दीप लामिछाने, कमल ऐरी, र आरिफ शेखको नाममा एक–एक विकेट रह्यो ।
आइसिसी पुरुष टी–२० विश्वकप छनोटअन्तर्गतको ग्लोबल छनोट ‘ए’ खेल्नुअघि नेपालले चारदेशीय सिरिज खेल्न लागेको हो । सिरिजमा आयोजक ओमानसहित, नेपाल, आयरल्यान्ड र युएई सहभागी छन् ।
