काठमाडौं । संस्कृति, पर्यटन तथा नागरिक उड्डयनमन्त्री प्रेमबहादुर आलेले आफ्नो मन्त्रालय अन्तरगतको अतिक्रमणमा परेका राज्यको सम्पति फिर्ता ल्याउन नसके आफू एक सेकेण्ड पनि मन्त्री पदमा नबस्ने बताउनुभएको छ ।
शुक्रबार पर्यटन मन्त्रालयमा आयोजित दोस्रो त्रैमासिक प्रगति समिक्षा र मन्त्रालयस्तरीय समस्या समाधान समितिको बैठकलाई सम्बोधन गर्दै मन्त्री आलेले मातहतका अतिक्रमित सरकारी सम्पति फिर्ता गर्न नसके आफू एक सेकेण्ड पनि पदमा नबस्ने बताउनुभएको हो ।
राज्यको दोहन भएको सम्पति फिर्ता ल्याउनु आफ्नो कर्तव्य भएको उहाँले बताउनुभयो । विगतदेखि नै सरकारी जग्गाहरुमा अतिक्रमण भइराखेको भएपनि सम्बन्धित निकाय टुलुटुलु हेरेर बसेको भन्दै आफूले फिर्ता गराएरै छाड्ने उहाँले बताउनुभयो । पदमा बसुन्जेल इमान्दारपूर्वक देशको लागि काम गर्ने मन्त्री आलेले प्रतिवद्धता व्यक्त गर्नुभयो । मन्त्री आलेले सरकारी नियुक्ती पाएका कर्मचारीहरुले अन्य व्यक्तिहरुसँग बसेर सेटिङ गरेको भेटिएमा सह्य नहुने चेतावनी दिनुभयो ।
उहाँले भन्नुभयो – ‘नारायणहिटी दरबार संग्रहालयको कुरा भो, धर्मशालाको कुरा भयो । मैले भनेको छु साथीहरुलाई पब्लिकको कोर्टमा यो बल गएको छ । यदी यो प्रोर्पटी हामीले रिटर्न ल्याउन सकेनौँ भने म त एक सेकेन्ड त्यहाँ बस्नेवाला छैन म । मलाई त्यो नैतिकता पनि छैन । म बस्न पनि सक्दैन । राज्यको सम्पती दोहन भएको छ त्यो फिर्ता ल्याउने कर्तव्य मेरो हो । सचिवजीको हो । हामी सबै मन्त्रालय, सरोकारवाला, पशुपति क्षेत्र विकास कोष हामी सबैको साझा समस्या हो यो । हामी एक्टिभ्ली लागौँ ।
गोठाटारमा सयौँ टहरा बनेर त्यहाँ अतिक्रमण भइराखेको छ । विगतदेखि हामी टुलुटुलु हेरेर बसेका छौँ । पशुपति क्षेत्र विकास कोषको जग्गा अतिक्रमण गर्न पाइन्छ ? खोइ त ध्यान गएको त्यहाँ ? त्यसको लागि सचिव महेश्वर न्यौपाने नै चाहिने ? प्रेम आले नै चाहिने मन्त्री ? विगतदेखि सिस्टम बिग्रेको अवस्था मैले देखेको छु । हामी जतिदिन बस्छौँ, देशको लागि काम गर्छौ । राष्ट्रको लागि काम गर्छौ । इमान्दारीताका साथ काम गर्छौ । र यसमा कसैले पनि गल्ती नगर्नु होला । कार्यालयमा नियुक्ती पाएका साथीहरु विभिन्न अर्को मान्छेसँग बसेर सेटिङ गर्ने यस्तो कामहरु भयो भने यो सह्य हुनेवाला छैन । तपाईहरु राम्रो सँग काम गर्नुस् ।’
नेपालका क्यासिनोहरुले बिगतमा मन्त्रीसँग सेटिङ गरेर कर नतिर्ने गरेको भन्दै उहाँले अहिले मन्त्रालय कर उठाउन लागेको बताउनुभयो । आफुले राम्रो काम गरिरहेपनि केही मिडियाहरु भने आफ्नो विरुद्धमा लागेको भन्दै उहाँले गलत समाचारमा विश्वास नगर्न आग्रह गर्नुभयो । उहाँले मन्त्रालयमा परिवर्तन देखिने गरी काम गर्न निर्देशन पनि दिनुभयो । उहाँले भन्नुभयो – ‘अहिले अर्थतन्त्र एकदम धराशयी भएको बेलामा कम्तीमा क्यासिनोमा अरबौँ रुपैयाँ राज्यले उठाउनुपर्ने तर उसले तिर्दैन ।
जुनसुकै मन्त्री आउँदाखेरी पनि यसो अलिअलि ट्याकटुक, ट्याकटुक मिलायो अनि त्यसपछि त्यत्तिकै बेरुजु, बेरुजु हुँदै जाने, महालेखाको मिटिङमा हामी जाँदाखेरी, लेखा समितिले बोलाउँदाखेरी त्यहाँ शिर निहु¥याउनुपर्छ । किनकी बेरुजु छ । हामीले असुल गर्न सकेका छैनौँ । यि सबै बेरुजु असुल गर्नका लागि मन्त्रालयका सचिवज्यू, विभागका महानिर्देशक लगायत हाम्रो सबै टिम नै सहयोग गरेको हुनाले हामी अहिलेसम्म सफल भएका छौँ । कहिलेकाहीँ त विभिन्न मिडियामा, अनलाइनहरुमा ति खरिदिएका अनलाइनहरु, दशहजार, बिसहजारमा बिक्ने अनलाइनहरुले विभिन्न मिडियामा दिग्भ्रमित समाचारहरु सम्प्रेषण गर्छन् । त्यो सत्यता होइन । हामी जे गरिराखेका छौँ देशका लागि गरिराखेका छौँ । र आफ्नो दायित्व हामीले पुरा गरिराखेका छौँ । राष्ट्रका लागि केही गरौँ । हामी सधैँ हुने त होइन, जति समय हामी हुन्छौँ गरौँ न देशको लागि । एउटा परिवर्तन ल्याउँ न हामी ।’
मन्त्री आलेले पुँजिगत खर्चलाई वृद्धि गर्नेतर्फ सबैको ध्यान जानुपर्ने बताउनुभयो । पर्यटन मन्त्रालयको पुँजिगत खर्च न्युन छ भनेर शिर निहुराउनुपर्ने अवस्था आउन नदिनेगरी काम गर्न उहाँले निर्देशन दिनुभयो ।
