एजेन्सी । दक्षिण एसियाली फुटबल महासंघ (साफ) च्याम्पियनसिप अन्तर्गत आज बुधबार साँझ आयोजक भारत र पाकिस्तानको टोली आमनेसामने हुँदैछन् । बैंगलोरको श्री कान्तीरवा स्टेडियममा यी दुईबीचको प्रतिष्ठित खेल नेपाली समयानुसार साँझ ७ः४५ बजे सुरु हुनेछ । दुवै टोली ५ वर्षपछि फुटबल मैदानमा आमनेसामने हुन लागेका हुन् ।
साफ च्याम्पियनसिप जुन २१ देखि जुलाई ४ सम्म चल्नेछ । समूह ‘ए’ मा भारतसँगै नेपाल, पाकिस्तान र कुवेत छन् । समूह बी मा लेबनान, माल्दिभ्स, भुटान र बंगलादेश छन् ।
पाकिस्तानपछि २४ जुनमा भारतले नेपालसँग र २७ जुनमा कुवेतसँग खेल्नेछ । प्रतियोगिताका २ वटा सेमिफाइनल जुलाई १ मा र फाइनल खेल ४ जुलाईमा बैंगलोरमा हुनेछ ।
भारत प्रतियोगिताको डिफेन्डिङ च्याम्पियन हो । टोलीले २०२१ मा अन्तिम उपाधि जितेको थियो । सन् १९९३ मा पहिलो टूर्नामेन्ट जितेर ४ पटक उपविजेता र १ पटक तेस्रो स्थानमा रहँदै भारतले ८ पटक ट्रफी कब्जा गरेको छ । प्रत्येक दुई वर्षमा आयोजना हुने प्रतियोगिताको १३ औं संस्करण बुधबारदेखि सुरु हुन लागेको हो ।
भारत बाहेक माल्दिभ्स २ पटक च्याम्पियन बनेको छ । योसँगै बंगलादेश, अफगानिस्तान र श्रीलंका एक–एक पटक च्याम्पियन बनेका छन् । भारतको चिर प्रतिद्वन्द्वी पाकिस्तानले भने एकपटक पनि प्रतियोगिताको फाइनल खेल्न सकेको छैन ।
भारत र पाकिस्तान सन् २०१८ पछि पहिलो पटक आमनेसामने हुँदैछन् । यसअघिको खेल साफ च्याम्पियनसिपमा नै खेलिएको थियो । यो खेल भारतले ३–१ ले जितेको थियो । भारत विरुद्ध पाकिस्तानको अन्तिम जित जुन २००५ मा भएको थियो, जब पाकिस्तानले मैत्रीपूर्ण खेल ३–० ले जितेको थियो । यी दुईबीच साफमा ८ खेल भएका छन् । जसमध्ये ६ खेलमा भारतले जित हासिल गर्दा पाकिस्तान एक पटक विजयी बन्यो । यस्तै, एक खेल भने बराबरीमा टुंगिएको थियो ।
१३ डिसेम्बर १९५९ मा भारत र पाकिस्तानको टोली पहिलो पटक अन्तर्राष्ट्रिय फुटबलमा आमनेसामने भएका थिए । यो खेल भारतले १–० ले जितेको थियो । त्यसयता यी दुईबीच कुल २४ खेल खेलिएका छन्, जसमा भारतले ११ र पाकिस्तानले मात्र ३ खेल जितेको छ । दुवैबीच १० वटा बराबरी पनि भएको छ ।
