काठमाडौँ । राष्ट्रिय स्वतन्त्र पार्टी (रास्वपा) ले दस्तावेजलाई अन्तिम रुप दिने भएको छ ।
सोमबार बिहान बसेको केन्द्रीय तथा संसदीय समितिको संयुक्त बैठकले दस्तावेजका लागि ७ वटा समूहबाट प्रतिनिधि हुने र इच्छुकहरू मध्येबाट कुल १७ जनाको प्रतिनिधिमण्डल बनाउने निर्णय गरेको हो ।
पार्टी प्रवक्ता मुकुल ढकालका अनुसार बैठकले पहिलो ड्राफ्टमा परेका संसोधनका प्रस्तावलाई आवश्यक छलफल गरी दोस्रो ड्राफ्ट तयार गर्ने निर्णय गरेको छ ।
उहाँले दस्तावेज तयार गर्न पुन: नीति विचार कार्यशाला गरी भदौको दोस्रो सातासम्म अन्तिम रुप दिने जानकारी दिनुभयो । दस्तावेजको अन्तिम ड्राफ्ट सभापतिलाई बुझाउने निर्णय गरिएको छ । दस्तावेजमाथि अन्तिम रुप दिने अधिकार सभापति रवि लामिछानेलाई दिइएको छ ।
नीति कार्यशालामा प्रस्तुत गरेको दस्तावेजमाथि पार्टी नेताहरुले आलोचना गरेपछि थप छलफल गर्ने गरि नीति कार्यशाला अघिल्लो साता रोकिएको थियो ।
बैठकमा पार्टी स्थापना भएको ७ असारमा स्थापना दिवस मनाउने तयारीका विषयमा पनि छलफल भएको ढकालले बताउनुभयो । उहाँका अनुसार केन्द्रीय कार्यालय नयाँ भवनमा सर्ने, नयाँ भवनमा ७ असारमा चियापान कार्यक्रम गर्ने जस्ता विषयमा छलफल एवं आवश्यक निर्णय भएको छ ।
