एजेन्सी । एसिया कप क्रिकेट प्रतियोगिता २०२३ का खेलहरू पाकिस्तान र श्रीलंकामा हुने भएका छन् । पाकिस्तानमा प्रतियोगिताका जम्मा ४ खेल हुनेछन् । बाँकी ९ खेल श्रीलंकामा हुनेछन् ।
समूह चरणको प्रारम्भिक चार खेल पाकिस्तानमा हुनेछ । जसमा एउटा समूहबाट नेपाल र पाकिस्तानबीचको खेल, अर्को समूहबाट अफगानिस्तान र बंगलादेश, अफगानिस्तान र श्रीलंका तथा बंगलादेश र श्रीलंकाबीचको खेल हुनेछ । यसको मतलब भारतले पाकिस्तानमा एक खेल पनि खेल्ने छैन । फाइनल पनि श्रीलंकामा हुनेछ ।
३१ अगस्टदेखि सेप्टेम्बर १७ सम्म हुने यस प्रतियोगिता कुन–कुन सहरमा हुने भन्ने जानकारी भने खुलाइएको छैन । श्रीलंकामा समुह चरणबाट भारत र पाकिस्तान, भारत र नेपालबीचको खेल हुनेछ । यसपछि दुवै समूहका शीर्ष २ टोली सुपर–४ मा पुग्नेछन् । सुपर–४ का सबै खेल र फाइनल पनि श्रीलंकामै हुनेछ ।
एसिया कपको चालू सिजनको आयोजना विवादमा फसेको छ । आयोजनाको जिम्मेवारी पाकिस्तानलाई दिइएको थियो तर एसीसीका अध्यक्ष तथा बीसीसीआई सचिव जय शाहले गत वर्ष अक्टोबरमा भारतीय टोलीलाई पाकिस्तान पठाउन अस्वीकार गरेका थिए । यस्तो अवस्थामा विवाद सिर्जना भएको हो ।
अन्तर्राष्ट्रिय क्रिकेट काउन्सिल (आईसीसी)को क्यालेन्डरमा पाकिस्तानलाई सन् २०२३ मा हुने एसिया कपको आयोजनाको जिम्मा दिइएको थियो । भारतीय क्रिकेट कन्ट्रोल बोर्ड (बीसीसीआई)ले क्यालेन्डर सार्वजनिक हुने वित्तिकै भारत पाकिस्तान खेल्न नजाने स्पष्ट पारेको थियो । बीसीसीआईले एसिया कप तटस्थ स्थानमा आयोजना गर्न भनेको थियो तर पाकिस्तान क्रिकेट बोर्डले सो कुरा मानेन । तर, पाकिस्तानले पनि हाइब्रिड मोडलमा प्रतियोगिता आयोजना गर्ने प्रस्ताव गरेको थियो ।
एसिया कप कसले कतिपटक जिते ?
भारत – ७ पटक (१९८४, १९८८, १९९०–९१, १९९५, २०१०, २०१६, २०१८)
श्रीलंका – ६ पटक (१९८६, १९९७, २००४, २००८, २०१४, २०२२)
पाकिस्तान – २ पटक (२०००, २०१२)
