विराटनगरः कोशी प्रदेशका प्रदेश प्रमुख पर्शुराम खापुङले प्रचलित प्रदेश ऐनमा प्रदेशको नाम संशोधन गर्न बनेको विधेयक, २०७९ आज प्रमाणीकरण गर्नुभएको छ ।
प्रदेश प्रमुख खापुङले नेपालको संविधानको धारा २०१ को उपधारा (२) बमोजिम उक्त विधेयक प्रमाणीकरण गर्नुभएको प्रदेश प्रमुखका प्रवक्ता नरेन्द्रकुमार श्रेष्ठद्वारा जारी विज्ञप्तिमा उल्लेख छ ।
विधेयक प्रमाणीकरणपश्चात् कानुनीरुपमा प्रदेश सरकारअन्तर्गतका सम्पूर्ण कार्यालयमा ‘कोशी प्रदेश’ लेख्नुपर्नेछ ।
कोशी प्रदेश नामकरणकै विरोधमा अर्कोतिर दिनहुँजसो कोशी प्रदेशका विभिन्न स्थानमा प्रदर्शन जारी छ । सरकारले प्रदर्शनमा भाग लिइरहका व्यक्ति तथा समूहहरूलाइ वार्ताका लागि निमन्त्रण गरिसकेको छ, तर खास केही हुन सकेको छैन ।
कोशी प्रदेशको विपक्षमा उभिएकाहरूसँग हालको सत्तापक्षकै केही घटकहरू जोडिएको पनि बताइएको छ । रासस
