काठमाडौं: नेपाल एयरलाइन्सले आफूसँग रहेका पाँच वटा चिनियाँ जहाजहरुको संचालन खर्च ज्यादै बढी भएको जनाउँदै ती जहाज बिक्री गर्नेगरी मूल्याँकन अन्तिम चरणमा पुगेको जनाएको छ ।
निगमले आज एक विज्ञप्ति प्रकाशन गरी नेपाल सरकारको निर्णय एवं निगम संचालक समितिको २०७९ भदौ २३ गतेको निर्णय बमोजिम उक्त जहाजहरु लिजमा दिनका लागि पहिलो पटक २०७९ भदौ २९ गते र दोस्रो पटक २०७९ कार्तिक १६ गते सूचना प्रकाशन गरिएको भए पनि निवेदन प्राप्त नभएको बताएको छ ।
लिजका लागि दुई पटक विज्ञापन गर्दा समेत आवेदन नपरेपछि नेपाल सरकारको निर्णय अनुसार जहाज बिक्री गर्ने सोचाईमा निगम पुगेको विज्ञप्तिमा उल्लेख छ ।
निगम समक्ष हाल दुई वटा एमए–६० र तीन वटा वाई१२ई चिनियाँ जहाज छन् । यी जहाज चलाउन नसके पछि हाल ग्राउन्डेड छन् । जहाज ग्राउन्डेड भएपछि संसदमा समेत कुरा उठेको थियो ।
यी जहाजका सम्बन्धमा अध्ययन गर्न गठित विगतका समितिहरुले उक्त जहाज संचालन गर्न प्राविधिक, व्यवसायिक तथा आर्थिक रुपमा अनुपयुक्त भएको, बिमा खर्च र इन्धन खर्च अत्यधिक भएको, सीमित यात्रु बहन क्षमता र जगेडा पार्टपुर्जामा समस्या भएको प्रतिवेदन दिएको निगमको दाबी छ ।
जहाजहरु संचालनमा रहँदा आर्थिक वर्ष २०७१।७२ देखि २०७५।७६ सम्मको अवधिमा यी जहाजहरुको संचालन घाटा रु. ७७ करोड ७४ लाख १० हजार र कूल घाटा रु. १ अर्ब ९० करोड ६९ लाख ३३ हजार रहेको निगमको भनाई छ ।
निगमका अनुसार यी जहाजहरु संचालन गरिरहँदा निगमलाई थप आर्थिक बोझको दायित्व थप हुने देखिएसँगै जहाजहरु ग्राउन्डेड गरिएको थियो ।
