एजेन्सी । च्याम्पियन्स लिग फुटबल अन्तर्गत फाइनल प्रवेशका लागि आज इंग्लिस क्लब म्यान्चेस्टर सिटी र स्पेनिस क्लब रियल मड्रिडले प्रतिस्पर्धा गर्दैछन् ।
सेमिफाइनलको दोस्रो लेग आज मध्यरातमा म्यान्चेस्टर सिटी र रियल मड्रिडबीच सिटीको घरेलु मैदान इतिहाडमा हुँदैछ । खेल नेपाली समयानुसार राति १२ः४५ बजे सुरु हुनेछ । यसअघि रियलको घरेलु मैदान सान्टियागो बर्नबेउमा १–१ गोलको बराबरी खेलेको सिटीले आज आफ्नो मैदानमा फाइदा उठाउने दाउमा छ । सिटीको घरेलु सर्मथकबीच खेल्न रियललाई चुनौतीपूर्ण हुनेछ ।
रियल मड्रिडले क्वाटरफाइनलमा चेल्सीलाई समग्रमा ४–० को नतिजाले पाखा लगाउँदै सेमिफाइनलमा स्थान बनाएको थियो । यस्तै, म्यान्चेस्टर सिटीले बायर्न म्युनिखलाई समग्रमा ४–१ ले पन्छाउँदै सेमिफाइनलको यात्रा तय गरेको हो ।
गत सिजनको च्याम्पियन्स लिगको सेमिफाइनलमै सिटी रियल मड्रिडसँग समग्रमा ६–५ ले पराजित हुँदै उपाधि सपना तुहिएको थियो । आज सिटी त्यसकै बदला लिने दाउमा हुनेछ । सिटीका कप्तान इल्काए गुन्डोवान, केभिन डी ब्रुएना र एर्लिङ हालाण्डको अट्याकिङलाई रोक्नु रियलका डिफेन्डरलाई कठिन हुनेछ ।
यता, रियलका कप्तान करिम बेन्जेमा, भिनिसियस जुनियर र रोड्रिगोले पनि सिटीका डिफेन्डरसामू चुनौती पेश गर्नेछन् । च्याम्पियन्स लिगमा रियल मड्रिडको इतिहास बलियो छ । साविक विजेतासमेत रहेको रियलले सर्वाधिक १४ पटक च्याम्पियन्स लिग जितेको छ ।
आजको विजेताले उपाधिका लागि जुन ११ मा इन्टर मिलानसँग प्रतिस्पर्धा गर्नेछ । इन्टरले गएराति भएको खेलमा शहरी प्रतिद्वन्द्वी एसी मिलानलाई समग्रमा ३–० को नतिजाले हराउँदै फाइनलमा स्थान बनाइसकेको छ । फाइनल खेल टर्कीको इस्तानबुल शहरमा हुनेछ ।
