काठमाडौं । राष्ट्रिय प्रजातन्त्र पार्टीका अध्यक्ष कमल थापाले राप्रपाले राजसंस्थाको एजेण्डा नछोड्ने बताएका छन् । उनले विगतमा राप्रपा पटक पटक सरकारमा गएको तर जनताले भने त्यसलाई नरुचाएको खुलासा पनि गरेका छन् । सरकारमा गएर विगतमा आफूहरुले गल्ति गरेको उनले बताएका छन् । उनले आज भनेका छन् 'अब यस्तो गल्ति हामीले दोहोर्याउने छैनौँ ।'
थापाले आज सामाजिक सञ्जालमा स्टाटस लेख्दै यस्तो बताएका हुन् । उनले आफूहरु सरकारमा गएको मतदाताले नरुचाएको पनि सो स्टाटसमा उल्लेख गरेका छन् ।
थापाले लेखेका छन्, ‘पटक पटक हामी सरकारमा गएको मतदातालाई चित्त बुझेन, त्यो प्रत्यूत्पादक भयो, गल्ति भयो । अब गल्ति दोहोरिने छैन ।’
थापाले राप्रपा सरकारमा गए पनि राजसंस्थाको मुद्दा नछोडेको बताएका छन् । ‘सरकारमा गए पनि राप्रपाले एक निमेष पनि राजसंस्था र हिन्दुराष्ट्रको एजेन्डा छोडेको छैन र छोड्ने छैन,’ उनले भनेका छन् ।
