काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले बाढी पहिरोमा परी हराइरहेका नागरिकको यथाशीघ्र खोजी गरी उद्धार तथा राहतका लागि सरकारसँग आग्रह गरेका छन् ।
अध्यक्ष दाहालले बुधबार एक विज्ञप्ति जारी गर्दै पीडितको तत्काल उद्धार, राहतमा जुट्न र राहतलाई प्रभावकारी बनाउन सरकारसँग आग्रह गरेका हुन् ।
यस्तै अध्यक्ष दाहालले बाढी पहिरो प्रभावित नागरिकको राहत तथा उद्धार कार्यमा खट्नका लागि पार्टीको सम्पूर्ण पङ्क्तिलाई एकीकृत रूपमा परिचालित हुनसमेत निर्देशन दिएका छन् ।
उनले विपद्मा परेर ज्यान गुमाएका परिवारलाई तत्काल क्षतिपूर्तिको व्यवस्था गर्न, बेपत्ताको खोजी गर्न तथा घाइतेको निःशुल्क स्वास्थ्योपचारको व्यवस्था गर्नसमेत माग गरेका छन् ।
