काठमाडौँ । एसीसी प्रिमियर कप अन्तर्गत नेपाल र साउदी अरेबियाबीच आज हुने भनिएको खेल वर्षाका कारण ढिलाई भएको छ ।
मुलपानी मैदान बिहान ९ बजे सुरु हुने भनिएको खेल मैदान भिजेका कारण अहिलेसम्म टस हुन सकेको छैन् । आइतबार साँझदेखि परेको वर्षाका कारण मैदान भिजेको हो ।
अहिले पिचमा कभर लगाइएको छ । नेपालले मुलपानी मैदानमा पहिलो अन्तर्राष्ट्रिय खेल खेल्दैछ । नेपालले एसीसी प्रिमियर कपमा लगातार दुई जित निकालिसकेको छ ।
एसियन क्रिकेट काउन्सिल (एसीसी)को आयोजनामा भइरहेको प्रतियोगिता यही वैशाख ५ गतेदेखि १८ गतेसम्म सञ्चालन हुनेछ । प्रतियोगिताका खेल कीर्तिपुरस्थित त्रिवि मैदान र मूलपानीमा रहेको क्रिकेट मैदानमा सञ्चालन हुनेछ । प्रतियोगितामा विभिन्न १० राष्ट्रको सहभागिता रहने छ । सहभागी राष्ट्रलाई दुई समूहमा विभाजन गरिएको छ ।
समूह ‘ए’ मा आयोजक नेपालसहित मलेसिया, साउदी अरेबिया, कतार र ओमान रहेका छन् । समूह ‘बी’ मा बहराइन, कुवेत, सिङ्गापुर, हङकङ र युएई रहेका छन् । फाइनल खेलको विजेता टोली एसिया कपका लागि छनोट हुनेछ । एसिया कप आगामी सेप्टेम्बरमा आयोजना हुनेछ ।
