काठमाडौँ । प्रधानमन्त्री पुष्पकमल दाहाल प्रचण्डले नेपालमा बनेका सवारी साधन दर्ता प्रक्रियाका लागि आवश्यक कानूनी प्रबन्ध मिलाउन मुख्यसचिव शंकरदास बैरागीलाई निर्देशन दिनुभएको छ ।
प्रधानमन्त्री प्रचण्डका प्रेस संयोजक सूर्य किरण शर्माका अनुसार आइतबार बिहान प्रधानमन्त्री प्रचण्डले मुख्यसचिव शंकरदास वैरागीलाई कानूनको मस्यौदा छिट्टै अगाडि बढाउन तथा प्रोत्साहनको नीति ल्याउन निर्देशन दिनुभएको हो ।
“नेपालमा बनेका सवारी साधन दर्ता नभएको भन्ने गुनासो आएकाले नागरिकको गुनासो सम्बोधन हुनेगरी दर्तासम्बन्धी कानूनको तयारी गर्न र नेपाली उत्पादनलाई प्रोत्साहन गर्ने नीति अख्तियार गर्न निर्देशन दिनुभएको हो”, शर्माले भन्नुभयो ।
प्रधानमन्त्रीको निर्देशनलगत्तै मुख्य सचिवले वैरागीले उद्योग, वाणिज्य तथा आपूर्ति मन्त्रालयका सचिव मधु मरासिनीलाई तत्कालै नेपालमा उत्पादित सवारी साधनको दर्ता एवं प्रवर्द्धनसम्बन्धी कानूनको मस्यौदा बनाई पेश गर्न निर्देशन दिएको शर्माले बताउनुभयो ।
‘यात्री’ लगायतका नेपालमै उत्पादित सवारी साधनले दर्ता भई काम गर्न नपाएका समाचार सार्वजनिक भएका थिए ।
