काठमाडौँ । निर्वाचन आचारसंहिताविपरीत काम गरेको भन्दै निर्वाचन आयोगले मधेश प्रदेशका मुख्यमन्त्री सरोजकुमार यादवसँग स्पष्टीकरण मागेको छ ।
उपनिर्वाचनका क्रममा मतदान भइरहेका बेला मुख्यमन्त्री यादव आज सरकारी गाडी र सुरक्षाकर्मीसहित बारा क्षेत्र नम्बर २ को पचरौता नगरपालिका क्षेत्रमा गएपछि आयोगले उहाँलाई स्पष्टीकरण मागेको हो ।
“निर्वाचन आचारसंहिता विपरीत हुने गरी उहाँलाई के कति कारणबाट पचरौता नगरपालिका क्षेत्रमा जानु भएको हो ? भनी स्पष्टीकरण सोधेको छ”, आयोगद्वारा जारी विज्ञप्तिमा उल्लेख छ ।
आयोगले मुख्यमन्त्री यादवलाई पचरौता जाँदा प्रयोग गरेको गाडी, सुरक्षा व्यवस्था सरकारको हो वा होइन भनेरसमेत सोधेको छ । मुख्यमन्त्री यादवलाई आयोगले २४ घण्टाभित्र स्पष्टीकरण दिन भनेको छ ।
