काठमाडौं । अमेरिकाका पूर्वराष्ट्रपति डोनाल्ड ट्रम्प अदालतमा उपस्थित भएका छन् । अन्तराष्ट्रिय संञ्चारमाध्यामहरुका अनुसार आफूमाथी लागेको आरोपका बारेमा सुनुवाईका लागि उनि अदालतमा उपस्थित भएका हुन् ।
अमेरिकामा फौजदारी अपराधको मुद्दा खेप्ने उनी पहिलो पूर्वराष्ट्रपति हुन् । आफ्ना पूर्व वकिल माइकल कोहेनमार्फत चलचित्र अभिनेत्री स्टोर्मी ड्यान्यल्सलाई सन् २०१६ को चुनावअघि रकम दिएकोसहित ३४ विषयमा उनीविरुद्ध मुद्दा चलेको छ। उनले आफूमाथि लागेका आरोप अस्वीकार गर्दै आएका छन् ।
म्यानहटन अदालतमा उपस्थित गराइँदा उनले आफूले कुनै अपराध नगरेको बताएको बीबीसीले जनाएको छ ।साथै उनिमाथी अवैध तरिकाले अर्बौं डलरको सम्पत्ति जम्मा गरेको, ह्वाइटहाउसबाट महत्वपूर्ण कागजात गायब पारेको, राष्ट्रपति निर्वाचनको परिणाम अस्वीकार गर्दै आफ्ना समर्थकलाई संसद भवनमा आक्रमणका लागि उक्साएको लगायतका आरोप लागेको छ ।
अदालतमा बयान दिएर निस्किएका ट्रम्प ले समर्थकहरुलाई सम्बोधन गर्दै आफूले कुनै गल्ती नगरेको र घटनालाई राजनीतिकरण गरिएको दाबी गरेका छन् । अदालतले उनलाई समर्थकहरुलाई उक्साउने अभिव्यक्ति नदिन निर्देशन समेत दिएको छ ।
५७ मिनेटको सुनुवाइपछि ट्रम्प न्यूयोर्कबाट फ्लोरिडास्थित आफ्नो घर ‘मार–ए–लागो’ पुगेका थिए । यहाँ उनले जनता र सञ्चारमाध्यमबीच सम्बोधन गरेका थिए । यहाँ ट्रम्पले भने – मैले कहिल्यै सोचेको थिइनँ कि अमेरिकी इतिहासमा यस्तो हुनेछ । मैले गरेको एउटै अपराध भनेको निडरताका साथ मेरो देशलाई नष्ट गर्न चाहनेहरूबाट रक्षा गर्नु हो ।’
फोटो-बीबीसी
