एजेन्सी । इन्डियन प्रिमियर लिग (आईपीएल)को १६ औं संस्करण आज शुक्रबाबाट सुरु हुँदैछ । उद्घाटन समारोह साँझ ६ः१५ बजे अहमदाबादको नरेन्द्र मोदी स्टेडियममा सुरु हुनेछ ।
यसपछि साँझ ७ः४५ बजेदेखि साविक विजेता गुजरात टाइटन्स र ४ पटकको विजेता चेन्नई सुपर किंग्सबीच खेल हुनेछ ।
यसैबीच, आईपीएलमा पहिलो पटक पञ्जाबी, उडिया र भोजपुरी भाषामा कमेन्ट्री हुनेछ । स्टार स्पोर्ट्सले हिन्दी, अङ्ग्रेजीलगायत ९ भाषामा कमेन्ट्री दिनेछ । साथै, यो खेल जियो सिनेमामा १२ भाषामा प्रसारण हुनेछ ।
धेरै दिग्गज क्रिकेटरहरू आईपीएलमा धेरै भाषाहरूमा कमेन्टरीका लागि जियो र स्टार स्पोर्ट्समा डेब्यू गर्नेछन् । जसमा मुरली विजय, एस श्रीसान्त, युसुफ पठान, मिताली राज र अष्ट्रेलियाका पूर्व कप्तान आरोन फिन्च र अस्ट्रेलियाली क्रिकेटर स्टिभ स्मिथ रहेका छन् ।
स्टारले सुनिल गावस्कर, ज्याक कालिस, केभिन पिटरसन, म्याथ्यू हेडन, आरोन फिन्च, टम मुडी, पल कलिङवुड, ड्यानियल भेट्टोरी, ड्यानी मोरिसन, स्टिभ स्मिथ र डेभिड हसीलाई इंग्लिस प्यानलमा समावेश गरेका छन् । आईपीएलमा पहिलो आरोन फिन्च र स्टिभ स्मिथ ब्याटको सट्टा माइक समात्दै गरेको देख्न सकिनेछ ।
आईपीएलमा सबैभन्दा बढी छक्का प्रहार गर्ने क्रिस गेल जियो सिनेमाको इंग्लिस कमेन्टरी प्यानलमा परेका छन् । उनीबाहेक आईपीएलमा आफ्नो खेलको जादू देखाइसकेका एबी डिभिलियर्स, इयोन मोर्गन, ब्रेट लीलाई पनि इंग्लिस कमेन्टरी प्यानलमा समावेश गरिएको छ । साथै प्यानलमा ग्रीम स्वान, ग्रीम स्मिथ, स्कट स्टाइरिस, सञ्जना गणेशन, सुप्रिया सिंह, सुहेल चन्दोक पनि परेका छन् ।
