काठमाडौँ । प्रधानमन्त्री पुष्पकमल दाहाल प्रचण्डले विस्तार गर्न लाग्नुभएको मन्त्रिपरिषद्मा नेपाली कांग्रेसले चार जनालाई मात्र मन्त्री बनाउने भएको छ ।
पार्टी सभापति शेरबहादुर देउवाले पार्टीभित्र भागवण्डा नमिलेपछि चार जनाको मात्र नाम प्रधानमन्त्री प्रचण्डलाई दिनुभएको छ।
उहाँले उपसभाति पूर्णबहादुर खड्का, प्रवक्ता डा प्रकाशशरण महत, रमेश रिजाल र सीता गुरुङको नाम पठाउनुभएको छ । उपसभापति खड्का उपप्रधानमन्त्री तथा रक्षामन्त्री, प्रवक्ता महत अर्थमन्त्री, रिजाल उद्योग र गुरुङ सहरी विकासमन्त्री बन्नुहुने बताइएको छ ।
नेपाली कांग्रेसले ८ वटा मन्त्रालय पाएको छ । तर शेखर कोइराला समूहले दुई मन्त्री स्वीकार नगर्ने बताएपछि बाँकी मन्त्रीहरुको नियुक्ति रोकिएको छ । कोइराला समूहले ३ वटा मन्त्रालय नपाए सरकारमा सहभागिता नजनाउने अडान राखेको छ ।
