काठमाडौँ । नेपाली कांग्रेसको संस्थापन इतर समूहले सरकारमा सम्मानजनक सहभागिता नगराइए सरकारमा सहभागिता नजनाउने बताएको छ ।
पार्टीको १४औँ महाधिवेशनमा डा शेखर कोइराला समूहबाट निर्वाचित पदाधिकारीमध्ये उपसभापति धनराज गुरुङ, महामन्त्री गगन थापा, सहमहामन्त्रीद्वय जीवन परियार र बद्री पाण्डेलगायतको बैठकले सरकारमा आफ्नो समूहको सम्मानजनक सहभागिता हुनेपर्ने अडान राखेको छ ।
सहमहामन्त्री परियारका अनुसार सरकारमा आफ्नो समूहको सम्मानजनक सहभागित हुनुपर्ने विषयमा बैठकमा छलफल भएको भन्दै सम्मानजनक सहभागिता नगराइए सरकारबाहिरै बस्ने कुरा उठेको छ ।
बैठकपछि नेता कोइरालाले पार्टी सभापति शेरबहादुर देउवा र प्रधानमन्त्री पुष्पकमल दाहाल प्रचण्डसमक्ष पनि सम्मानजनक सहभागिता हुनुपर्ने सन्देश सुनाउनुभएको बताइएको छ ।
आज मन्त्रिपरिषद् विस्तार हुँदैछ । नेपाली कांग्रेसले आठ वटा मन्त्रालय पाउने सहमति भएको छ । कोइराला समूहबाट उपसभापति गुरुङ र मोरङबाट निर्वाचित डिगबहादुर लिम्बूलाई मन्त्री बनाउने चर्चा छ तर उक्त समूहले कम्तीमा तीनवटा मन्त्रालय चाहिने बताउँदै आएको छ ।
