काठमाडौं । प्रधानमन्त्री पुष्पकमल दाहाल प्रचण्डले आज शुक्रबार मन्त्रिपरिषद् विस्तार गर्दै हुनुहुन्छ । प्रधानमन्त्रीले सत्ता गठबन्धनका दलसँग एक बजेसम्ममा मन्त्रीको नाम माग गर्नुभएको छ । प्रधानमन्त्रीले नयाँ मन्त्रीहरुलाई आजै दिउँसो ३ बजे शपथ गराउने तयारी गर्नुभएको बताईएको छ ।
गठबन्धनबाट सरकारमा सहभागी हुने ९ दलमा कांग्रेसलाई ८, माओवादीलाई प्रधानमन्त्रीसहित ५, नेकपा (एकीकृत समाजवादी)लाई २, जसपालाई २, जनमतलाई एक राज्यमन्त्रीसहित २, लोसपा १, उन्मुक्तिलाई १, आम जनता पार्टीलाई १ र नेसपालाई १ मन्त्रालय भागमा परेको छ । यद्यपि, मन्त्रालय बाँडफाँटको विषयमा भने अझै स्पष्ट रुपमा टुङ्गिएको छैन ।
कांग्रेसबाट उपसभापति पूर्णबहादुर खड्काको नेतृत्वमा ८ जना मन्त्री बन्नेछन् । जसमा रक्षा, अर्थसहितको मन्त्रालय पाउने निश्चित भइसकेको छ । यस्तै, नेकपा(एकीकृत समाजवादी)बाट भौतिक पूर्वाधारमा प्रकाश ज्वाला र कृषि मन्त्रालयमा बेदुराम भुसाल जाने निश्चित भएको बताईएको छ ।
लोसपाबाट शरदसिं भण्डारी श्रम तथा रोजगार मन्त्री बन्ने भएका छन् । यस्तै, जसपाले शिक्षा र वन मन्त्रालय पाएकोको छ । तर को मन्त्री बन्ने भन्ने बारे अझै टुङ्गिएको छैन ।
