काठमाडौँ । सरकार र मिटरब्याज पीडित किसानबीच वार्ता सकिएको छ । गृह मन्त्रालयमा बिहीबार दिउँसो भएको वार्ता पुनः बस्ने गरी सकिएको हो ।
वार्तामा सरकार र मिटरब्याज पीडितले आआफ्नो धारणा राखेको मिटरब्याजविरुद्धको संघर्ष समितिका संयोजक मनोज पासवानले बताउनुभयो । उहाँकाअनुसार अर्को वार्ता बिहीबार नै साँझ ६ बजे बस्नेछ ।
वार्तामा संघर्ष समितिले प्रधानमन्त्रीलाई लेखेको ९ बुँदे माग सरकारी वार्ता टोलीका संयोजक गृह मन्त्रालयकी सहसचिव रुद्रादेवी शर्मालाई बुझाएको छ ।
मिटरब्याज संघर्ष समितिले यसअघि मिटरब्याज अपराध नियन्त्रण कार्यदलबाट प्रस्तुत प्रतिवेदन समेत अध्ययन गर्न र अन्य पीडितहरुसँग पनि छलफल गर्न समय मागेको थियो । त्यसपछि बेलुका पुनः वार्ता गर्ने गरी दिउँसोको वार्ता स्थगित भएको पासवान बताउनुभयो ।
पासवानले वार्ता ठीकै रहेको र सरकारसँग आशावादी रहेको बताउनुभयो । “जफत भएको जमिन फिर्ता गरिनुपर्छ, मुद्दा लागेका पीडितको मुद्दा खारेज हुनुपर्छ, सबै समस्या समाधान गर्ने आयोग गठन गर्नुपर्छ”, उहाँले भन्नुभयो ।
