काठमाडौँ । नेपालको आइसिसी विश्वकप छनोट खेल्ने सम्भावना कायमै रहेको छ । आइसिसी विश्वकप लिग–२ त्रिकोणात्मक ओडिआई सिरिजमा शीर्ष तीनमा स्थान बनायो भने नेपालले सिधै छनोट खेल्न पाउछ । त्यसको लागि नेपालले बाँकी ८ मध्य ७ खेल जित्नुपर्ने हुन्छ ।
आइसिसी विश्वकप लिग–२ का शीर्ष तीन टोलीले आगमी जिम्बावेमा हुने विश्वकप छनोट खेल्न पाउनेछन् । यसअघि नै स्कटल्यान्ड ३६ खेलमा २४ जित र १० हारसहित ५० अंकका साथ च्याम्पियन बन्दै विश्वकप छनोटमा पुगिसकेको छ । यस्तै, ओमानले पनि ३६ खेलमा २१ मा जित र १३ हारसहित ४४ अंकका साथ दोस्रो स्थानमा रहँदै छनोटमा पुगेको छ ।
अव नेपाल, नामिबिया र युएई मध्येका एक टोलीले शीर्ष तीनमा रहँदै विश्वकप छनोट खेल्न पाउनेछन् । नेपाल २८ खेलमा १२ जित र १४ मा हारसहित छैटौं स्थानमा रहेको छ । यस्तै, युएई २८ खेलमा १३ जित र १२ हारसहित २९ अंकका साथ पाँचौं स्थानमा छ भने नामिबियाले ३६ खेलमा १९ जित र १६ हारसहित ३९ अंक पाएको छ ।
नामिबियालाई पछि पार्न नेपालले ८ मध्य ७ खेल जित्नैपर्ने दबाव रहेको छ । नेपालले बाकि सबै खेल जित्दा ४२ अंक पाउनेछ
भने ७ खेल जित्दा ४० र ६ खेल जित्दा ३८ अंक पाउनेछ । नामिबियाले ३९ अंक पाईसकेकोले नेपालले कम्तिमा नि ७ खेल जित्नैपर्ने हुन्छ ।
नेपालले अव युएईसँग चार र पपुवा न्युगिनीसँग चार खेल खेल्नेछ । दुबईमा सोमबारबाट हुने त्रिकोणात्मक ओडिआई सिरिजमा नेपाल, पपुवा न्युगिनी र युएई भिड्नेछन् । त्यसपछि, बाकि रहेको सिरिज भने टियु मैदानमा हुनेछ ।
युएईलाई पनि नेपालले चार मध्येका तीन खेलमा हराउनु पर्ने हुन्छ । युएईकोे नेपालसँग तीन हार र बाँकी पाँच खेलमा सबै जित निकाल्दा पनि ३९ अंकमा मात्रै हुन्छ । यता नेपालको भने युएईसँग एक खेलमा हार र बाँकी सबै खेलमा जित निकाल्दा ४० अंक हुनेछ ।
नेपालले सोझै अोडिआई मान्यता जोगाउन ८ खेलमा ५ खेल जित्नुपर्ने हुन्छ । नेपालले ५ खेल जित्दा ३६ अंक हुन्छ । शीर्ष पाँचमा पर्न ३६ अंक पर्याप्त हुनेछ । लिग २ मा शीर्ष पाँच र क्वालिफायर प्लेअफमा शीर्ष चारमा पर्न नसके चार वर्षको लागि ओडिआई मान्यता गुम्नेछ ।
