काठमाडौँ । नेकपा एमालेले ‘मिसन ग्रासरूट’ सुरू गरेको छ । पार्टी संगठन सुदृढीकरण तथा विस्तार अभियान अध्यक्ष एवं समग्र अभियानको संयोजक रहेका केपी शर्मा ओलीले आज अभियानको शुभारम्भ गरेका हुन् । एमालेले पार्टीलाई जगैदेखि बलियो बनाउने भन्दै यो अभियान सुरू गरेको जनाएको छ ।
एमालेले यो अभियान अन्तर्गत पार्टीका पोलिटव्यूरो र केन्द्रीय कमिटी सदस्यहरूलाई अभियानको केन्द्रीय प्रतिनिधिका रूपमा पालिका तहमा दुईमहिनाको जिम्मेवारी दिएर खटाएको छ ।
यस्तै, उपाध्यक्षदेखि स्थायी कमिटीसम्मका नेताहरूको टिमले अभियानको अनुगमन र संयोजन गर्नेछन् । अभियानको शुभारम्भ अभिमुखीकरणबाट गरिने भएकाले अनुगमन र संयोजनको जिम्मेवारीमा रहेका नेताहरू आ–आफ्नो जिम्मेवारी तोकिएका प्रदेशमा पुगेका छन् ।
अभिमुखीकरणका लागि प्रदेश–१ मा उपाध्यक्ष अष्टलक्ष्मी शाक्य, मधेश प्रदेशमा बरिष्ठ उपाध्यक्ष ईश्वर पोखरेल, बाग्मती प्रदेशमा उपाध्यक्ष सुरेन्द्र पाण्डे, गण्डकी प्रदेशमा उपाध्यक्ष युवराज ज्ञवाली, लुम्बिनी प्रदेशमा उपाध्यक्ष रामबहादुर थापा, कर्णाली प्रदेशमा उपाध्यक्ष सुवासचन्द्र नेम्वाङ र सुदूरपश्चिम प्रदेशमा उपाध्यक्ष विष्णुप्रसाद पौडेल तोकिएका छन् ।
पार्टीलाई वैचारिक र संगठनात्मकरूपमा सुदृढ गरी मुलुकमा राजनीतिक स्थायित्वको प्रत्याभूति गर्ने बलियो शक्तिका रूपमा स्थापित गर्न यो विशेष अभियानको थालनी गरिएको एमालेले जनाएको छ ।
अभियान नेपाल कम्युनिष्ट पार्टी स्थापनाको दिन अर्थात् बैशाख ९ गते समापन गरिने छ ।
