एजेन्सी । चीनको जियाङ्सी राज्यको नान्चाङ काउन्टीमा शनिबार ठूलो दुर्घटना भएको छ । नेपाली समय अनुसार राति १०ः४५ बजे यहाँ सडक दुर्घटना हुँदा १९ जनाको मृत्यु भएको थियो ।
दुर्घटनामा बीस जना घाइते भएका छन् । स्थानीय सञ्चारमाध्यमका अनुसार घाइतेहरूलाई तत्कालै अस्पतालमा भर्ना गरिएको थियो ।
अल जजिराको रिपोर्टका अनुसार केही व्यक्ति शव लिएर शवदाह गृहमा गइरहेका थिए । त्यसपछि एउटा ट्रकले उनीहरुलाई ठक्कर दिएको थियो । ट्रकका चालकले मानिसलाई किच्दै गए । जसका कारण शवयात्रामा सहभागी अधिकांश व्यक्तिको ज्यान गयो वा घाइते भए । घटनाको एक घण्टापछि प्रहरी घटनास्थल पुगेको थियो ।
स्थानीय सञ्चारमाध्यमका अनुसार कुहिरोका कारण ट्रक चालकले मानिसहरूलाई देख्न सकेनन् । दुर्घटनापछि ट्राफिक प्रहरीले सूचना जारी गरेको थियो । जसमा यात्रुहरूले फग लाइटमा ध्यान दिनुपर्ने, ढिलो र सुरक्षित रूपमा सवारी चलाउनु पर्ने, मानिसहरूले सडक परिवर्तन र ओभरटेक गर्नबाट जोगिनु पर्ने लगायतका जानकारी गराइएको छ ।
