जनकपुरधाम । मधेश प्रदेशमा यही पुस २८ गतेभित्र सरकार गठनका लागि दाबी पेश गर्न आह्वान गरिएको छ ।
मधेश प्रदेश प्रमुख हरिशंकर मिश्रले पुस २८ गते दिउँसो ४ बजेसम्ममा प्रदेशमा सम्मिलित सदस्यलाई बहुमतसहित मुख्यमन्त्रीमा दाबी पेश गर्न आह्वान गर्नुभएको हो ।
मधेश प्रदेशमा १०७ सदस्य रहेका छन् । प्रदेशमा आवश्यक ५४ सिट कुनै पनि दलले प्राप्त गर्न नसकेकाले प्रदेशप्रमुख मिश्रले संविधानको धारा १६८ को उपधारा २ अनुसार मुख्यमन्त्री पेश गर्न आह्वान गर्नुभएको हो ।
उक्त उपधाराअनुसार दुई वा दुईभन्दा बढी दलको समर्थनमा बहुमतप्राप्त प्रदेशसभा सदस्यले मुख्यमन्त्री दाबी पेश गर्न सक्नेछ ।
मधेश प्रदेशमा २३ सिटसहित सबैभन्दा ठूलो नेकपा (एमाले) रहेको छ । नेपाली कांग्रेसको २२, जनता समाजवादी पार्टी (जसपा) को १६, जनमत पार्टीको १३, नेकपा (माओवादी केन्द्र) र लोकतान्त्रिक समाजवादी (लोसपा) को को ९/९, नेकपा (एकीकृत समाजवादी)को ७, नागरिक उन्मुक्ति पार्टी, राष्ट्रिय प्रजातन्त्र पार्टी (राप्रपा) र नेपाल संघीय समाजवादीको १/१ तथा स्वन्त्र ५ सदस्य रहेका छन् ।
