काठमाडौँ । आगामी चैत ५ गते प्रस्तावित स्ववियु निर्वाचनको नेकपा (एकीकृत समाजवादी) निकट विद्यार्थी संगठन अनेरास्ववियुले स्वागत गरेको छ ।
प्रधानमन्त्री पुष्पकमल दाहाल प्रचण्डलाई भेटेर अनेरास्ववियुले यो पटक स्ववियुमा पूर्ण समानुपातिक निर्वाचन लागु गराउन निर्देशनका लागि ज्ञापनपत्र बुझाएको छ । प्रधानमन्त्री प्रचण्ड त्रिभुवन विश्वविद्यालयको कुलपतिसमेत हुनुहुन्छ ।
अनेरास्ववियुका अध्यक्ष सुदेश पराजुलीसहितको विद्यार्थी टोलीले शुक्रबार बिहान प्रधानमन्त्री निवास बालुवाटारमा भेटेर प्रधानमन्त्री प्रचण्डसमक्ष पूर्ण समानुपातिक निर्वाचन लागु गराउन ज्ञापनपत्र बुझाएको हो ।
संगठनले निर्वाचन सबै वर्ग र समुदायको प्रतिनिधित्व गर्न समावेशी सिद्धान्तअनुसार पूर्ण समानुपातिक प्रणालीमार्फत हुनुपर्ने माग गरेको छ ।
साथै विश्वविद्यालय एवं क्याम्पसहरूमा उत्कृष्ट शैक्षिक वातावरण निर्माण गर्न प्रत्येक स्ववियुमा सम्बन्धित शैक्षिक संस्थाको उत्कृष्ट एक/एक जना छात्र र छात्रालाई सहभागी गराइनुपर्ने समेत संगठनको माग छ ।
त्रिवि विद्यार्थी कल्याण परिषद्द्वारा चैत ५ मा प्रस्तावित स्ववियु चुनावको स्वागत गरेको छ ।
ज्ञापनपत्रमा विश्वविद्यालयमा स्ववियुको आवधिक निर्वाचन नहुँदा विश्वविद्यालयमा प्रशासनको मनोमानी व्याप्त रहेको उल्लेख छ ।
विश्वविद्यालयहरु ज्ञान निर्माण गर्ने केन्द्र हुनुपर्नेमा विभिन्न खाले विसङ्गति, भ्रष्टाचार र अनियमितताका केन्द्र बनेको पनि ज्ञापनपत्रमा उल्लेख छ ।
अध्यक्ष पराजुलीले विद्यार्थीहरू चर्को शुल्क तिर्न बाध्य भएकाले यी सबै विसंगतिको अन्त्य गर्न, स्वच्छ शैक्षिक वातावरण निर्माण गर्न र विद्यार्थीले आफ्ना हक अधिकारको प्रत्याभूति गर्न स्ववियुको निर्वाचन यथाशक्य गराउन प्रधानमन्त्रीसमक्ष ज्ञापनपत्र बुझाएको बताउनुभयो ।
त्रिवि विद्यार्थी कल्याण परिषद्ले आगामी चैत ५ गते स्ववियु निर्वाचन गर्ने प्रस्ताव गरेको हो ।
