काठमाडौँ । नेपाली कांग्रेसमा चार केन्द्रीय सदस्य र दुई जिल्ला सभापतिमाथि निर्वाचनमा अन्तर्घात गरेको आरोपमा कारबाहीको सिफारिस गरिएको छ ।
कांग्रेस केन्द्रीय कार्यालयले प्रतिनिधिसभा तथा प्रदेशसभा सदस्य निर्वाचनमा अन्तर्घात गर्नेहरुको नामावली पठाउन थप एक महिनाको समय दिएको थियो । केन्द्रीय अनुशासन आयोगका अनुसार हालसम्म चार केन्द्रीय सदस्य र दुई जिल्ला सभापतिमाथि कारबाहीको सिफारिस भइसकेको छ ।
पार्टी केन्द्रीय कार्यालयले सुरुमा पुस १५ गतेसम्मको समय दिएको र सोही अवधिमा काभ्रे, सोलुखुम्बु र कपिलवस्तुबाट कारबाहीको सिफारिस आएको हो । कारबाही सिफारिस हुनुअघि नै दोलखाबाट पनि केन्द्रमा उजुरी परेको थियो ।
पार्टीको काभ्रे जिल्ला कार्यसमितिले दुई केन्द्रीय सदस्य मधु आचार्य र गणेश लामामाथि कारबाहीको सिफारिस गरेको छ । आचार्यमाथि प्रतिनिधिसभा सदस्यमा गठबन्धनबाट कांग्रेस उम्मेदवार बनेका शिव हुमागाईंलाई हराउन भूमिका खेलेको आरोप लगाइएको छ ।
त्यसैगरी लामामाथि पनि प्रदेशसभा सदस्यमा जिल्ला सभापति तीर्थ लामालाई हराउन भूमिका निर्वाह गरेको आरोप छ । यद्यपि तीर्थ लामाले नेकपा (एमाले) का चन्द्र लामालाई २ मतले मात्र पराजित गरेका थिए ।
काभ्रेकै कञ्चनबादे श्रेष्ठमाथि पनि कारबाही सिफारिस गरिएको छ । उनी प्रदेशसभा सदस्य तथा पूर्वमन्त्री समेत हुन् ।
त्यस्तै सोलुखुम्बुमा जिल्ला सभापति नाम्गेल जाङ्बु शेर्पामाथि कारबाही सिफारिस गरिएको छ । शेर्पाका साथै केन्द्रीय सदस्य आङ्गेलु शेर्पामाथि जिल्ला सचिव भलाकाजी राई र युवराज घिमिरेले संयुक्तरुपमा केन्द्रीय अनुशासन आयोगमा कारबाहीको सिफारिस गरेका हुन् ।
केन्द्रीय सदस्य र जिल्ला सभापतिले कांग्रेस नेता बलबहादुर केसीलाई पराजित गर्न भूमिका निर्वाह गरेको आरोप लागेको छ । प्रतिनिधिसभा सदस्यमा सोलुखुम्बुबाट नेकपा (एमाले) का मानवीर राईले केसीलाई पराजित गरेका थिए ।
उम्मेदवार केसीले समेत जिल्ला सभापति र केन्द्रीय सदस्यले एमालेलाई मत मागेको आरोप लगाउँदै कारबाहीका लागि उजुरी दिएका थिए ।
कपिलवस्तुमा जिल्ला सभापति अब्दुल कलामसहितका नेताहरुमाथि कारबाहीको सिफारिस गरिएको छ । जिल्ला सभापति कलामसहित नेताहरु वीरेन्द्र कनौडिया, जिल्ला उपसभापति हुमकान्त खनाल, सचिव प्रेमबहादुर रायमाझी, क्षेत्रीय सभापति ब्रह्मानन्द पाण्डेयलगायतमाथि पराजित उम्मेदवार अभिषेक प्रताप शाहले अन्तर्घात गरेको आरोप लगाउँदै उजुरी दिएका थिए ।
त्यस्तै दोलखाका कांग्रेस जिल्ला सभापति बर्मा लामाले केन्द्रीय सदस्य अजयबाबु शिवाकोटीमाथि अन्तर्घात गरेको भन्दै कारबाहीको माग गरेका छन् । लामाले शिवाकोटीमाथि अन्तर्घात गरेर आफूलाई प्रदेशसभा सदस्यमा पराजित गरेको आरोप लगाएका छन् ।
