काठमाडौँ । स्वतन्त्र सांसद प्रभु साहले नयाँ पार्टी घोषणाको तयारी गरेका छन् । उनले आज एक पत्रकार सम्मेलन गर्दै पार्टी घोषणा गर्ने भएका हुन् । यसका लागि उनले आफ्ना समूहका नेताहरुबीच छलफलसमेत गर्दै आएका छन् ।
आज दिउँसो ३ बजे बिजुली बजारस्थित क्रिस्टल प्यालेसमा पत्रकार सम्मेलन हुँदैछ । सांसद साहले आफ्ना समूहका नेताहरुसँग भएको अनौपचारिक छलफलको निचोड आज सार्वजनिक गर्ने बताएका छन् ।
नेकपा एमाले छाडेर रौतहट निर्वाचन क्षेत्र नं ३ बाट स्वतन्त्ररुपमा उम्मेदवारी दिएका साह प्रतिनिधिसभा सदस्यमा निर्वाचित भएका थिए । उनले नयाँ पार्टीको नाम आम जनता पार्टी हुनसक्ने बताएका छन् ।
साह तत्कालीन नेकपा (माओवादी) का केन्द्रीय सदस्यसमेत हुन् । उनी माओवादी जनयुद्धताका २०५५ मा भूमिगत भएका थिए ।
नेकपा पार्टी फुटेर एमाले र माओवादी केन्द्र बन्दा उनी एमालेमा लागेका थिए । तर गत मंसिर ४ गते भएको प्रतिनिधिसभा निर्वाचनअघि उनले एमाले छोडेको घोषणा गरेका थिए ।
