काठमाडौँ । जनमत पार्टीले प्रधानमन्त्री पुष्पकमल दाहाल नेतृत्वको सरकारमा उद्योग मन्त्रालय पाएको छ । पार्टीबाट उपाध्यक्ष अब्दुल खान उद्योगमन्त्री बन्ने हुनुभएको छ ।
पार्टी अध्यक्ष सीके राउतले सञ्चारकर्मीहरुसँग कुरा गर्दै भागबण्डामा उद्योग, वाणिज्य तथा आपूर्ति मन्त्रालय प्राप्त सञ्चारकर्मीहरुलाई बताउनुभयो ।
सत्ता गठबन्धनको बैठकपछि उहाँले भन्नुभयो, “हाम्रो पार्टीले उद्योग मन्त्रालय पाएको छ । जसमा उपाध्यक्ष अब्दुल खान जानु हुनेछ ।”
यसअघि अध्यक्ष राउतको नेतृत्वमै सरकारमा जाने चर्चा थियो तर उहाँले आफू सरकारमा नजाने बताउनुभयो । पार्टी उपाध्यक्ष खान समानुपातिकबाट प्रतिनिधिसभा सदस्य हुनुहुन्छ । प्रतिनिधिसभामा प्रत्यक्षतर्फ एक मात्र सिट अध्यक्ष राउतले जित्नुभएको थियो । पार्टीको प्रतिनिधिसभामा ५ सिट छ ।
