काठमाडौँ । राष्ट्रिय प्रजातन्त्र पार्टीका नेता तथा नवनिर्वाचित प्रतिनिधि सभा सदस्य पशुपति समशेर जबराले भ्रष्टाचारको विरुद्धमा आवाज उठाउने बताउनुभएको छ ।
आईतवार समानुपातिक निर्वाचन प्रणालीबाट प्रतिनिधि सभा सदस्य निर्वाचित भएको प्रमाणपत्र बुझेपछि सञ्चारकर्मीलाई संक्षिप्त प्रतिक्रिया दिँदै प्रतिनिधि सभा सदस्य राणाले संसदमा भ्रष्टाचार र घुसखोरीका बिरुद्धमा आवाज उठाउने बताउनुभएको हो । उहाँले संसदमा आफूहरुको राष्ट्रवादी भुमिका हुने उल्लेख गर्नुभयो । उहाँले देशलाई अरुले धेरै तल झारेको भन्दै आफूहरुले संसदबाट नेपाल र नेपाली जनतालाई माथि पु¥याउने बताउनु भयो ।
उहाँले भन्नुभयो – ‘सबभन्दा पहिला राष्ट्रवादी अनि यो मुलुकको भ्रष्टाचारबारे, घुसखोरीबारे हामी एकदम आवाज उठाउँछौँ । यो मुलुकलाई धेरै तल झारेका छन् । त्यसैले हाम्रो चेष्टाबाट, हामी सरकारमा नभएपनि संसदमा हुन्छौँ । संसद बाट नेपाल र नेपाली जनतालाई माथि पु¥याउछौँ ।’
त्यस्तै नेकपा (एमाले) को तर्फबाट वागमती प्रदेश सभामा निर्वाचित प्रदेश सभा सदस्य डा. दिनेश देवकोटाले प्रदेशलाई सबलीकरण गर्नका लागि आफूले भुमिका खेल्ने बताउनु भयो । उहाँले भुँइका मानिसहरुलाई माथि उठाउने गरी काम गर्ने बताउनु भयो । सञ्चारकर्मीहरुको जिज्ञासाको जवाफ दिँदै प्रदेश सभा सदस्य देवकोटाले सरकारले पछिल्लो पटक अध्यादेश ल्याएर लोकतन्त्रलाई उपहास गर्न खोजेको बताउनु भयो ।
उहाँले भन्नुभयो – ‘सरकारले अध्यादेश ल्याउनु लोकतन्त्रको उपहास गर्न खोजेको हो । काम चलाउ सरकारले अध्यादेश ल्याउनु प्रजातन्त्र र लोकतन्त्रलाई नै खिल्ली उडाउने खालको काम हो । संघीयतालाई आक्रमण गर्नेगरी मान्छेहरु लागेका छन् । प्रदेशलाई सवलीकरण गर्नेगरी मेरो बुद्धि विवेक र अनुभव प्रयोग हुनेछ ।’
जनता समाजवादी पार्टीको तर्फबाट मधेस प्रदेशमा निर्वाचित प्रदेश सभा सदस्य मनिष सुमनले संघीयता र प्रादेशिक व्यवस्थालाई थप बलियो बनाउन लाग्ने बताउनु भयो । उहाँले कुनैपनि वर्ग, जाती, क्षेत्र र लिङ्गको आधारमा हुने विभेदको अन्त्य गराउन लागिपर्ने उहाँको भनाई छ ।
उहाँले भन्नुभयो – ‘आगामी पाँच वर्ष भित्र संघीयतालाई, प्रादेशिक व्यवस्थालाई थप बलियो, थप सुसंगठित बनाउनको लागि जसपाको तर्फबाट म लगायत सबै सांसद साथीहरु अग्रसर रहनुहुनेछ । प्रदेशलाई थप बलियो बनाउने । हाम्रो मुख्य ध्येय । यो मुलुकमा कसैलाई वर्गको आधारमा, जातको आधारमा, क्षेत्र, लिङ्गको आधारमा विभेद नगरियोस् । विभेदमुक्त देश बनाउने । देशमा हुने सबै समस्या समाधानका लागि हामी लागि पर्नेछौँ ।’
उहाँले देशमा हुने सबै प्रकारको समस्या समाधानका लागि आफुहरु लागिपर्ने बताउनु भयो ।
