काठमाडौँ । प्रहरीले फिफा विश्वकप २०२२ लगायतका विश्वमा सञ्चालन हुने खेल तथा गतिविधिहरुमा सट्टबाजी गर्न प्रयोग हुने रसियन बेटिङ एप्लिकेशन ‘वान एक्स बेट’ मार्फत सट्टेबाजी गराउने व्यक्तिलाई प्रकाउ गरेको छ ।
पक्राउ पर्नेमा महोत्तरी जिल्लाको महोत्तरी गाउँपालिका– १ घर भई हाल ललितपुर सानेपा बस्दै आएका २० वर्षीय आदर्श ठाकुर रहेका छन् । प्रहरीले एक्स बेट मार्फत सट्टाबाजी लगाउन रकम संकलन गर्ने–गराउने कार्यमा एजेन्टहरु सक्रिय रहेको सुचनाको आधारमा सोमबार उनलाई नियन्त्रणमा लिएको हो ।
उनीमाथि मुलुकी अपराध संहिताको दफा १२५ को उपदफा ४ बमोजिम सट्टाबाजी गर्न–गराउन नहुने कसुर अन्तर्गत थप अनुसन्धान एवम् कारबाहीको लागि जिप्रका ललितपुर पठाइएको प्रहरीले जनाएको छ ।
ठाकुरले वान एक्स बेटमा सट्टाबाजी गराउन विगत ८ महिनादेखि सट्टेबाजी गर्ने एजेन्टको रुपमा कार्य गर्दै आएको पाइएको छ । उनले २ करोड २ लाख ८४ हजार ४४८ बराबरको रकम वालेटबाट रकमान्तरण गरेको प्रहरीले जनाएको छ । हालसम्म अनुसन्धानका क्रममा खुल्न आएका ४८५ वटा विभिन्न सेवा प्रदायकहरुका डिजिटल वालेटहरुको कारोवार रोक्का राखी थप अनुसन्धान जारी रहेको प्रहरीले जनाएको छ ।
