काठमाडौँ । प्रहरीले ‘हनि ट्रयाप’मा संलग्न एक पुरुष र २ महिलासहित ३ जनालाई पक्राउ गरेको छ ।
पक्राउ पर्नेमा घोराही–१० नारायणपुरका २७ वर्षीय रुद्रबहादुर केसी, तुलसीपुर १८ ग्वारखोलाकी ३६ वर्षीया कृष्णकुमारी बस्नेत, गढवा–६ घर भई हाल तुलसीपुर बस्दै आएकी ३५ वर्षीया अनुष्का सिंह भनेर चिनिने कृष्णा गहतराज छन् ।
प्रहरीका अनुसार उनीहरूले तुलसीपुरका एकजना व्यवसायीलाई मेसेन्जर र मोबाइलबाट शारीरिक सम्पर्कको प्रस्ताव राखेको र पछि बलात्कार मुद्दा हाल्ने भनी मोटो रकम ब्ल्याकमेलिङ गरेको खुल्नमा आएको छ ।
उनीहरीबीचको मोबाइल मेसेज र मेसेन्जरको कुराकानीमा ५ करोडको बार्गेनिङ गरेको देखिएको र नगद ३० लाख बुझिसकेको बताइएको छ । बार्गेनिङ गरे अनुसार थप पैसा माग्दै गर्दा ३ जनालाई प्रहरीले नियन्त्रणमा लिएको हो ।
पीडित भनिएका दाङका ४५ वर्षीय पुरुषल आफूलाई यौन सम्पर्कको प्रस्ताव राख्दै ब्ल्याकमेलिङ गर्न खोजेपछि प्रहरीमा जाहेरी दिएका थिए ।
कृष्णाले घरजग्गा समेत किनिदिन भन्दै ५ करोडसम्म बार्गेनिङ गर्न थालिन् । त्यसक्रममा उनले कृष्णाकुमारी बस्नेत र रुद्र केसी भनिने पुरुषको सहयोग लिइन् । उनले पीडित पुरुषलाई मात्र नभएर उनको परिवारलाई समेत धम्क्याउन थालेपछि यो घटना प्रहरी कहाँ पुगेको थियो ।
तीनजनाविरुद्ध मुद्दा दर्ता गरेर अनुसन्धान थालिएको प्रहरीले जनाएको छ ।
