काठमाडौँ । नेपाल राष्ट्र बैंकले वाणिज्य बैंकहरुमा शंकास्पद कारोबार ह्वात्तै बढेको प्रतिवेदन सार्वजनिक गरेको छ ।
केन्द्रीय बैंकको वित्तीय जानकारी एकाईले प्रकाशन गरेको वार्षिक प्रतिवेदनमा वाणिज्य बैंकहरुको शंकास्पद कारोबार बढेको उल्लेख छ । प्रतिवेदनमा अघिल्लो आर्थिक वर्षको तुलनामा शंकास्पद कारोबार ८१ प्रतिशतले बढेको उल्लेख छ ।
सम्पत्ति शुद्धीकरण निवारण ऐनमा शंकास्पद कारोबार भएको तीन दिनभित्र एकाईमा रिपोर्ट गर्नुपर्ने प्रावधानअनुसार गत आर्थिक वर्षमा वाणिज्य बैंकहरुले दुई हजार ३८० वटा शंकास्पद कारोबार भएको रिपोर्टिङ एकाईमा गरेका थिए । अघिल्लो आर्थिक वर्ष एक हजार ४०३ वटा शंकास्पद कारोबार भएको रिपोर्ट गरिएको थियो ।
रिपोर्टिङ विकास बैंक, वित्त कम्पनी, लघुवित्त, बीमा, विप्रेषण कम्पनी, धितोपत्र कम्पनी, सहकारी तथा सरकारी निकायले गरेका हुन् । सम्पत्ति शुद्धीकरणको सूचना संकलन र विश्लेषण गर्ने वित्तीय जानकारी एकाईमा यी सबै संस्थाको दुई हजार ७८० वटा शंकास्पद कारोबार भएको रिपोर्टिङ भएको थियो ।
