एजन्सी । बेल्जियमका स्टार खेलाडी इडन हाजार्डले अन्तर्राष्ट्रिय फुटबलबाट सन्यासको घोषणा गरेका छन् । विश्वकपबाट बेल्जियम समूह चरणबाटै बाहिरिएपछि ३१ वर्षीय हाजार्डले सन्यासको घोषणा गरेका हुन् ।
हाजार्डले बेल्जियमका लागि १२६ खेलमा ३३ गोल गरेका छन् । सन् २०१८ मा रुसमा आयोजना भएको विश्वकपमा बेल्जियन टोलीले सेमिफाइनलसम्मको यात्रा तय गरेको थियो ।
हाजार्डले सामाजिक सञ्जालमार्फत सन्यासको घोषणा गर्दै समर्थन र सहयोगका लागि सबैलाई धन्यवाद दिएका छन् । ‘आज एक पाना पल्टिनेछ, अविश्वसनीय समर्थन र सहयोगका लागि सबैलाई धन्यवाद्। सन् २००८ देखि मैले खुशी साट्ने मौका पाएँ, मैले अन्तर्राष्ट्रिय फुटबल करिअरलाई बिट् मार्ने निर्णय गरेको छु । उत्तराधिकारी तयार छन्, म सबैलाई सम्झिरहने छु,’ उनले भनेका छन् ।
हाजार्ड हाल स्पेनिस ला लिगामा रियल मड्रिडबाट फुटबल खेल्छन् । यसअघि चेल्सीमा रहेका उनले ३५२ खेलमा ११० गोल गरेका थिए । उनी सन् २०१२ मा लिलबाट चेल्सी गएका थिए ।
चेल्सीमा सात सिजन बिताएका उनले प्रिमियर लिग र युरोपा लिगका साथै एफएकप र लिग कपको उपाधि जितेका थिए । उनी चेल्सीमा चारपटक वर्ष खेलाडी घोषित भए ।
